عزيزي زوج المستقبل

اينعم لسه بدري عليك اوي

بس انا حقولك عشان تبقى عارف يا اخويا

وما تقولش اننا ضحكنا عليك ولا حاجه

مبدئيا انت حتتجوز اوزعه من الدرجه الاولى

يعني جمله من فضلك تعالى ناولني كذا .. ولا انا مش طايله كذا ديه حتسمعها كتير

وحضرتك لازم تقوم من سكات تجيبلي الحاجه اللي انا مش طايلاها ..

ثانيا وده الاهم .. اوعى يكون همك على بطنك .. انت حتتجوز فاشلة برضه من الدرجه الاولى في المطبخ .. ما بعرفش اعمل حاجه وما عنديش اسعداد اتعلم انا بقولك اهو .. يعني يوم ماك ويوم بيتزا ويوم شاورما والباقي نمشي حالنا باندومي وناجتس وبطاطس فريتس .. وممكن نعتمد على ماما وطنط .. احنا ولادهم برضه

ثالثا لازم تبقى عارف كويس اوي ان انا طفله وعيله وانك لازم تعتبرني بنتك قبل أي حاجه وتوقع دايما مني أي تصرفات طفوليه شقيه وتقبلها بصدر رحب واوعك تتنرفز ولا تتضايق

رابعا .. نظام المسح والكنس والغسيل والتنشير والمكوة والفلم ده مش انا هاااااااااا .. بمعنى ان اللي عايز حاجه يعملها لنفسه وحنمشي بمبدا  ( help yourself  ) انا بقول اهوو

خامسا .. عيد ميلادي وعيد جوازنا وعيد الحب و6 اكتوبر وشم النسيم ديه ايام مقدسه اوعى تنساها .. اهم حاجه تكون فاكر وانا حعمل نفسي مش واخده بالي وانك فاجئتني  =D

سادسا.. قبل ما تيجي تتقدملي اعرف انك حتخوض حرب عنيفه جدا .. انت جاي تتقدم لبكريه وحبيبه ابوها ولبة عقله .. ومش حتكسب بالساهل ابدا .. اقنع بابا بقى يا فالح لو تقدر انك مناسب لبنته حبيبته

سابعا .. عايزاك تتطمن خالص من ناحيه التلفزيون انا حسيبك تتفرج على كل الماتشات والاخباار من غير ما اضايقك .. انا حقعد على الفيس ساعتها ... ماشي ؟

ثامنا .. لما اعوز اشتري شوز لازم يبقى بالك طويل لاننا حنتعب اوي على ما نلاقي مقاسي .. اصل (35_36 ) ده مقاس مش متوفر اوي .. L

تاسعا .. مش بحب قعدة البيت انا .. لازم نخرج كل شوية ونغير جو ونفك مود الكابة .. وعلى فكرة تمشيه عالبحر وشم الهوا كفاية اوي بالنسبالي

عاشرا .. صحابك ؟؟ عمري ما حقولك مش بحبهم ولا بستتقل دمهم ولا ما تسهرش معاهم ... هو البني ادم ايه غير كائن حواليه شله بيحبهم ويحبوه .. الكلام ده على صاحباتي انا كمان على فكرة  ..

حداشر .. اذا في يوم اتهورت وقررت ادخل المطبخ ابقى تعالى ساعدني .. وكل وانت ساكت ولا تقولي الرز محصول ولا المكرونه معجنه ولا مالح ولا عادب ولا ولا ولا ولا .. احمد ربنا وابتسم ابتسامه صفرا وقولي تسلم ايدك .. (بعدين روح اعمل غسيل معده عادي يعني )

اتناشر .. اوعى في يوم تقولي مش رايح الشغل اصلي عيان ولا تعبان ولا ولا ولا .. لالالالالالالالالا انت متجوز صيدلانيه قد الدنيا وحقفشك يعني حقفشك يا كذاااب

تلتاشر .. اعرف كويس اوي اني بني ادمه مغرورة جدا ..  مغرورة بممتلكاتي .. واعرف كويس جدا اني بعد كده حتغر بيك لانك حتبقى من ممتلكاتي . J

اربعتاشر .. عارف انت اليوم اللي حتقول فيه كلمه تزعلني ولا حتبصلي فيه بصه وحشه .. انا عمري ما حقدر انساه .. حاول ما تخلنيش افضل فاكرالك حاجات وحشه كتير ..

خمستاشر .. بيتنا حيبقى مكان مكنون .. وبينا حيبقى فيه سر .. عايزاك تتاكد اني عمري ما حطلعه برا ..

ستاشر .. انا مجنونه اها .. ومش نكديه ولا قفيله ولا أي كلام فاضي من ده .. بس يوم ما نحتاج نبقى جديين .. حتلاقيني اعقل واحده في الدنيا ديه

سبعتاشر .. انا بحب السوبيا والموكا والباميا والبوري السنجاري والمسقعه والافلام الاجنبي ومحمد منير وفيروز  واللون الازرق والاخضر .. انت بتحبهم زيي ؟

تمنتاشر .. اوعى تكون عينك زايغه ولا تبص يمين ولا تبص شمال .. كده كده مش حتلاقي احلى مني يا ابني انت بتتكلم في ايه

تسعتاشر .. بعدين بعدين

عشرين .. انت اخترتني انا .. وديه تخليني اعمل كل حاجه تخليك اسعد بني ادم في الدنيا .. والناس حتقولك انك عرفت تختار وحيسدوك عليا كمان .. يلا يا سيدي ابسط

عزيزي زوج المستقبل .. انا حاسه ان طنط دعت عليك الصراحه

ياريت ما تجيش احسن