نمت 8 ساعات متواصل من غير ما اقلق ولا مره
.. صحيت 9 الصبح ومش ورايا حاجه لحد الساعه 4 .. ده في حد ذاته شيء جميل بعد كذا
يوم متعبين .. وحاجه تفرح ولو شوية بعد يومين اكتئاب محترمين .. قررت اليوم يبقى
حلو ولو بشوية تفاصيل صغيرة جدا .. قررت اني افطر بقهوة عربي .. ريحتها بتستفز
ذاكرتي انها تفتكر حاجات معينه وناس معينه في وقت من الاوقات .. وانا بشربها
حسيتني محتاجه اسمع حاجه حلوة .. حاجه شبه القهوة .. محمد عبده .. بحب اسمع بنت
النور بس سمعت مذهلة
طيبها قسوة جفاها
ضحكها هيبة بكاها
روحها حدة ذكاها
تملأك بالاسئلة .. مذهلة
الكلمات تنكش تفكيرك .. ازاي اتكتب ..
ازاي اتكتب
يا بدايات المحبه يا نهايات الوله
هالحسن سبحان ربه
ظالم وما اعدله
كوبليه بيأسرني وبيلخص كل اشكال اغاني العشق
في عقلي ..
كلمت ماما .. اصرت ان اكيد عندي شيزوفرينيا
.. يعني اعيط تزعل اضحك تزعل ؟؟ طب انا اعمل ايه في نفسي ..
اتضبط مودي عالصبح .. بصيت للاوضه .. محتاجه
تتروق .. التسريحه مليانه حاجات لازم تترمي .. وانا طبعا احتفظت بيهم وما رمتش
حاجه ( جين مصري )
عديت فيونكاتي .. بقو 21 .. ربنا يزيد ويبارك
في كل حاجه بحبها وبحب تبقى عندي ..
دورت على مكان مناسب احط فيه هديه السبكي ..
فكرت شوية .. اللي ما عندوش صاحب دماغه ماشيه بالمقلوب زي مصطفى كده (بيجيب هدايا لاصحابه
في عيد ميلاده !!).. يبقى شلته كلها ما لهاش لازمة .. ما لقتش مكان حلو للصورة
فحفكر مره تانيه ان شاء الله
بعد ما خلصت كانت الحصيله 10 جنيه ونص فضه
طلعو من كل حته في الاوضه .. فتحت الشباك اللي ما اتفتحش من زمان .. شكل اوضتي
بنور الشمس بس احتواني .. القعدة احتاجت كوباية شاي .. وانا بعمله ولعت الفحم
للبخور .. حطيت المبخرة في.. الاوضه وقعدت قدام المراية .. اتأملت شوية في الندبة
الجديدة .. الكلية بجد عايزة تسيبلي علامات كتير .. والله عمري ما حنسى اني دخلتها
..
بعدها قررت اكلم صحاب قدام .. صحاب نفس
الايام اللي القهوة بتفكرني بيها .. هي مش نداله ولا قلة اهتمام بناس مهمه عندك ..
بس الدنيا كده بقى .. اروى ما ردتش .. ممكن يكون الرقم اتغير اصلي ما كلمتهاش من
زمان اوي ... نورهان كلامنا كان قليل لانها كانت لسه واصلة البيت .. وآلاء
فالكعاده كلامها مبهج وجميل .. ضحكتها كأنها دقات قلب بجد ..
روحت الكورس .. خلصنا وقعدت مع سلام ونجوى ..
اتكلمنا كتير .. الكلام بيفك الواحد حتى لو كله حاجات كانت وما بقتش .. حتى لو كله
هموم وحاجات تاعباك .. حقيقي نعمه انك تتكلم وتتسمع ..
اسامه بعتلي ينكشني ويسأل عالامتحان ..
بفتكره ببتسم .. شكرا اقزاز ..
حبيت اليوم يخلص بحاجه بحبها برضه .. ما
دونتش من زمان .. حاجه كانت واقفه بيني وبين زحمة .. مش عارفه ايه ولا عارفه حفضل
كده ولا ايه بس حسيت اليوم بسيط ويستاهل افتكرة بعدين .. شكرا لكل اللي كانو فيه
