حالة السوف !!!

الواحد عايش اليومين دول حالة ال (سوف ) بكل اشكالها واحلامها البلهاء الغبية اللي بتثبتلي اني لازم يجي عليا اوقات يتقال فيها اني متخلفة عقليا   .. افتكر من سنتين اول ما نزلت مصر .. قولت انا اول ما اهلي يسافروا حعيش حالة مزيج من شوية افلام كده اللي بيبقى البطل عايش فيها لوحده وماشي بدماغه .. يصحى الصبح يسمع فيروز ويعمل القهوة المحوجه على رواق ويشربها في البلكونه وهو بيرتب افكاره  وينقي لبسه بمنتهى البساطه .. في اوضه مترتبه ودولاب كل هدومه مكوية بالفطرة .. ودايما اتخيل شكلي (كطالبة جامعية ) وانا قاعده في مدرج المحاضرات في كرسي في النص بالزبط ويميني وشمالي ناس مش صحابي .. او بشتغل في اللاب وانا لابسه البالطو والنظاره وتبدو عليا ملامح الفهم العميق للي انا بعمله .. وفي نص اليوم اقف اتكلم مع اصحابي .. (واقفين مش قاعدين ) كلمتين في السريع كده نرتب فيهم خروجة الويك اند .. اما بقى في ايام الشتا .. فلازم امشي بشمسية في محطة الرمل واقعد في البن البرازيلي اتفرج عالناس والشتا من جوا .. وبعدين اركب الترام وانا بشم ريحة اسكندرية بطعم الشتا .. اوصل البيت .. اشغل الدفايه واعملي كوباية نسكويك .. . اما بقى يوم الجمعه فده يوم جميل .. بصحى براحتي من غير منبه .. وبقعد ارغي فيه في التليفون .. وبرتب حعمل ايه الاسبوع الجاي .. واخرج اشوف صحابي في مكان اتفقنا عليه مسبقا .. وهوووووووووووووب اتقلب من على السرير ... قصدي السنه تخلص وانا ما عملتش حاجه من ديه ..

لأن ببساطه .. انا بصحى الصبح متلهوجة جدا .. بجري حوالين نفسي ادور في مغارات الدولاب حلبس ايه ؟! انهي اسهل في المكوة ؟؟ اصل فكرة ان الدولاب متروق ديه بشوفها مرتين في السنه لما ببدل الصيفي والشتوي .. غير كده الهدوم متكورة في بعضها على شكل سرر من الهدوم لو جدع اعرف لاقي حاجه على الصبح .. ولو حظي سعفني ..الاقي الشنطه اللي ماشيه مع الطقم والشنطه بتاعة اليوم اللي قبله اللي فيها المحفظة وباقي الحاجات .. اصل برضه نادر اوي لما اوضتي تتروق !! وبالتالي مش فاكره امتى اخر مره سمعت فيها فيروز ولا حتى القهوة بقت عادة بعد ا ضغطتي بقى يعلى بسببها .. ولو سمعت في يوم ميجا اف ام الصبح وانا في الطريق للكليه يبقى ده يوم سعيد .. !!

بالنسبه لنظرتي لنفسي في مخيلتي عن المدرج والمعمل .. فمش عارفه ده ازاي ؟؟ انا كـ (مرام ) ما بحضرش محاضرات لاني فقدت قدرة التركيز ديه من زمان .. فاضيع وقتي ليه بكلام حذاكره اخر السنه وخلاص .. اما نظرة الثقة بتاعه المعمل فديه .. ( كذبة عظيمة ) لان انا عمري ما فهمت حاجه في السيكشن .. الموضوع كله اقلب حاجه على حاجه تديك  (Reddish Brown (   

يبقى انت كده تمام خد الدرجه يلا .. بلنسبه للوقوف مع صحابي فانا اول واحده باقعدهم عشان انا بكره اكون واقفه .. وبالنسبه للكلمتين في السريع فبيمتدوا للساع 6 و7 و8 احيانا .. اما لخروجات الويك اند فده لو في ويك اند لان الكورسات بتسيب ايام ربنا كلها وتمسك في الجمعه معرفش ليه .. الجمعه اللي ساعات بيبقى شغله ومجهوده اكتر من الايام العاديه .. بالنسبة للمشي في الشتا وكده .. فلازم اعترف اني كائن صحراوي حتى ايام الشتا الدنيا كانت بتبقى ناشفه .. اتكيف بصعوبة على البلد اللي طول الشتا مستحميه ديه زائد اننا عايشة وسط ناس مش بتقدر النسكويك ولا الاثار المترتبه على النسكويك !!!

المهم ان انا اتخيلت ده سنه 2012 .. وتخيلته سنه 2013 .. وبتخيله السنه ديه وحفضل كده شكلي لغاية ما اتخرج من غير ما احقق احلامي في حياة  بطل فيلم عايش بمزاجه وماشي بكيفه .. وليه طقوس يوميه لطيفة !!  

فيلي الازرق .. :)

في قمة انسجامي .. في قمة سعادتي .. انا فرحت فرحة يمكن مبالغ فيها بالفيلم ده شوفته اجمل من ما كل الناس شافته .. دخلته وانا ناوية استمتع بيه وبكل تفصيلة مهما كانت تافهة اول ممله ولو ان تقريبا ما كانش فيه النوع ده من التفاصيل .. صوت الميوزك اتمزج بصوت تقليب صفحات الرواية .. نفسي اتحبس مع كل حباية بلعها وانا ضامة جسمي كله فوق الكرسي .. بعدين ارجع اخده تاني وانا بتفرد واقعد مضبوط لما يفوق ..

الكلب .. الكلب اللي بيطلع من السجاده .. الكلب اللي بيظهر ويختفي في ثانية .. الكلب اللي شوفت خيالة بتاع 6 مرات من ساعة ما خرجت من القاعه .. شوفته في قلب فنجال القهوة ولفيت ورا ضهري في الاسانسير وما اتطمنتش انه ممكن يكون قاعد مستنيني اول ما افتح الدولاب ومش مستبعده انه مستخبي دلوقتي وسط خيوط سجاده من السجاجيد .. انا عايشة حالة الفلم بطريقة ما حصلتليش من ساعة ما اتفرجت على  

Into The Wailed

الفيلم محتاج تروح هادي .. في حالة تسمح بالاستمتاع والسعادة .. تتنفس كويس اوي قبل ما تدخل .. وازازة ميا مهمة عشان نشفان الريق حيبقى زيادة .. وحاول  تتجاهل ضحك الناس اللي حوالك في اوقات غلط !!

اول ما خلص حسيت اني مش قادرة اقوم من الكرسي .. عايزة اقعد حبة استوعب .. قومت منهكة ومرهقة بطريقة مش مفهومة .. سلام شاركتني نفس الاحساس بطريقته حسستني اني ما اتجننتش لوحدي ..

حاسه انه يستاهل انتظار الناس ليه بالطريقه ديه .. واني عايزة اشوفه مره كمان كريم عبد العزيز .. اسرني بالذات في لحظات خوفه واتضطرابه وشكه في نفسه .. خالد الصاوي قتل عندي كل احتمالات ان ناس تانيه كان ممكن تعمل الدور احسن . وعجبتني طلة نيللي .. الهادية الانيقه من غير افتعال ولا تصنع ...
 كل حاجه كانت مكانها .. كل شخصية كانت لايقه على صاحبها ..

اه .. انا عندي احساس مريب بأن انا صاحبة الفيلم .. وان نجاحه حيبقى نجاح ليا ..  يلا عالبركة .. احجزولي مكان في العباسية ..

ج حريم !! 

صباحكم عيد :)

هو بصراحه كان مشروع تدوينة

اتكتبت بتاع 6 مرات كده ولا حاجه

كل مره ماالاقيلهاش قفله فامسحها بالراحه بطريقه كلاسيكه كاني بهد بيت من بيوتي

الواحد كان نفسه يعبر عن رمضان والعيد والمرحله العابرة ولحظات السعاده والبؤس

وكلام طويل عن عجلة الدنيا اللي بقت تلف اسرع وان رمضان الجاي حيجي بسرعه

زي ما مشى بسرعه من غير ما نحس ..

او يمكن حسينا باعلانات كوكا وبيبسي وشيبسي والبنك الاهلي وتاتس بالمسقعه

وحسينا بالنهايات السخيفة بتاعة المسلسلات اللي كانت في لحظة ما في نظري عبقرية

هو مش كان زمان معظم النهايات سعيده ومممكن ممكن ممممكن تبقى حزينة !!!

المهم اني ماعرفتش اكتب حاجه مع ان كان نفسي  وشايفه ان جملة كل سنة وانتم طيبين

كافية  لحين اشعار اخر .. واصلا التالف من الخلايا العصبيه في دماغي

صباحكم عيد 

قبل ان اكون عشرينية !!

يبدو لي ان بوادر العشرين تجتاحني .. اصبحت اكثر نضجا الى حد التقزز

اشعر بعمق ضحكاتي وانخفاض صوتها بل وحتى مدتها !!

أفكاري لم تعد تلك اللي كانت تراودني قبل نصف عام .. تبدو وكأنها أفكار تملؤوها البلاهة مرتدية حلة كلمات الراشدين !!

لم ترقني وربما لن ... اشعر بنظرة اكثر ثقبا للاشياء تفقدها جنونها الباهي السابق .. اثقلتني افكار المستقبل التقليدي .. ذو الرتابة العاقلة مسيرة الخطوات مسبقا وبالاجماع ..

ما زلت اعود أذني على ان تستمع لطفولتي .. كل ما تغنوا به في التسعينات .. لازلت احن لطفولة سعيده انتهت .. لن اهنأ ما دمت ارى الماضي اكثر جمالا وهدوءا .. ما زلت احاول الاحساس بالحاضر المليء بالاشخاص الهائمون والمؤثرون والمارين بسلام وتاركي الندبات وعابري سبيل الايام .. واخرين ..

فلنعد للنضج السخيف ..

اصبحت امارس اليوجا الذهنية رغما عني ولا اراديا .. ترتكز عيناي على نقظة ما في الفراغ .. اهيم في التفكير في اللاشيء الذي لا يؤثر فيه شيء وفي وضعية ثابته لفترة ليست قصيرة .. ثم استفيق .. الهي مرت ساعة لم تطرق فيها فكرة عابرة اجراس عقلي ؟؟؟؟؟؟؟          ربما نسيت خلالها ما هو اسمي وكم عمري واين انا وماذا افعل في حياتي ؟؟؟

اين انا من الساعات المهرولة .. او العداءة ؟؟ متى تعلم الزمن ان يركض في المضمار وكيف استطاع ان ينجح .. لم يعد هناك احساس بالساعه الراهنة .. ولا باليوم الفائت ولا كيف ينتهي اليوم في ساعه والساعه في وضمة عين ..

ترهبني الفكرة الوارده .. هل ساصبح عشرينية حقا بعد عدد من ومضات الاعين تتمثل في بضعة اشهر ؟؟؟  أهدا بعد نظرات البحث عني في صور الطفولة .. ما تبقى منها .. ربي يوما كنت طفلة ولم اصدق  انني ساصبح يوما عشرينيه .. او انني ساهاب ان اكون عشرينيه قبل ان اكون .. ؟؟!! 

10000

تقدر تفكر في حاجه عملتها 10000 مره ؟؟؟؟

انا عمري بالايام اكتر من 7000 يوم .. يمكن ضحكت فيهم اكتر من 10000 مره .. بلعت اكتر من 10000 مستيكه .. طلعت 10000 سلمة .. قريا 10000 كلمه ... اكلت 10000 حباية رز .. بحلم يبقى عندي 10000 كتاب .. واكتب 10000 تدوينة .. واعرف 10000 شخص .. واقبض 10000 جنية كل شهر .. واشتري 10000 جزمة مقاس (35_36) .. اعمل دوا يعالج 10000 بني ادم (بس مش كفته ) ... ازور 10000 مكان جديد.. اعرف اعمل 10000 اكله ... اعرف 10000 معلومه غريبه مااصدقهاش .. اخس 10000 جم ... ممكن اعد شعر راسي بس اكيد حيطلع اقل من 10000 شعر .. ممكن احاول اتعلم 10000 كلمة صيني ... المهم ان كلها افتراضات ... احلام واماني .. صعب تحصل اصلا

لكن حقيقه ال 10000 الوحيده في حياتي لغاية دلوقتي

زحمة ... 10000 زائر ..

مبروك يا زحمة 

قايمة ال30 حاجه اللي ممكن تتعمل في الاسبوعين الزياده !!

 

الحمد لله .. ربنا كارم الواحد بحكومة زي الفل حققت مطلبي كواحده من الشعب وبعدتني عن الكليه ال استغفر الله العظيم يارب الواحد مش عايز يغلط   :D

وبما ان الشهر اللي فات ده طااااااار وذهب مع الريح وخرج ولم يعد والخ الخ الخ .. قولت لا بقى طالما ربنا كرمنا باسبوعين .. يبقى لازم نعمل حاجه ان شاء الله كانت حاجه عبيطه او مجنونه او ملهش اي تلاتين لازمه .. تفاصيل كل نقطه وسبب اختياري ليها والهدف منها

حتنزل على صفحه مجلة

PLACEPOOOOOOO

https://www.facebook.com/placebomagazine2017

بعدين حبقى انزلها هنا على رواااااق ..

استعنا عالشقا بالله .. يلا

1)    اكتب قايمة ال30 بتاعتك .. قايمة فيها 30 حاجه انت حتحاول تعملهم وتخلصهم طول ما ربنا مديك عمر .. مش مهم الحاجات ديه تكون مهمه للناس .. المهم تكون بالنسبالك هدف وحلم ونجاح !!

2)    اسمع هشام الجخ .. هويس الشعر .. ايوة بغير   J

3)    هات ورقة .. اكتب فيها الاغاني اللي حتشغلها في فرحك ..

4)    اتفرج على فيلم UP

5)    اتعلم تقول كلمة وحشتني او افتقدتك ب6 او 7 لغات مختلفه ومش معروفة

6)    احفظ او راجع اول 10 ايات من سورة الكهف J

7)    افتح فيديوهات يوجا وحاول تعمل زيهم

8)    خد دوش او شاور س من نوع مختلف

9)    ارجع تاني لايام التسعينات .. بطريقتك

10)    اقرا رواية خان الخليلي .. واستمتع بنجيب محفوظ وبالادب بجد

11)    دور على طريقة رسم العين او الشمعه او اي حاجه وجرب حتى لو ما 

بتعرفش ترسم طول عمرك

12)    حد عدد معين .. ليكن 20 .. وانوي انك خلال الالاسبوعين تصلي 20 ركعه ما بين الضحى وقيام الليل وتكون كل ركعة بدعوة J

13)    خوش المطبخ .. اعمل سينابون .. مش عارف ازاي .. حبقى اقولك ونعك سوا :D

14)    حاول توصل لحد من المدرسين بتوع زمان .. اسأل عليه J

15)    حاول لمدة يوم تستغني عن موبايلك ولاب توبك وياريت عن الاصانصير والمواصلات وعيش يوم من ايام قبيلة قريش .. عيش طبيعي يعني

16)    حط في بالك حتعمل ايه رمضان الجاي J

17)    كل يوم قبل ما تنام افتكر سنه من سنين دراستك في المدرسه ابدا باولى ابتدائي شكل الفصل وصحابك في الوقت ده وهكذا

18)    دور على حد ناسيه من زمان .. اتصل بيه واسال عنه .. واوعده انك حتكررها

19)    افتح يوتيوب .. اتفرج على اي حلقة من برنامج خواطر .. لاحمد الشقيري .. وحتدعيلي J

20)    دور على حاجه قديمه عندك وعيد تدويرها

21)    ازرع حلبة او فول في قطن زي ايام زمان :D

22)    اغاني بتحبها بصوت عالي وغني غني غني مهما كان صوتك زباله .. وامسك الفرشه كانها مايك

23)    ياريت بقى وانت بتغني .. ترقص زومبا .. انت مش حتعرف تضبط ولا حركة بس حتنبسط

24)    دور على صورك وانت صغير .. نقي كام صورة حلوين .. حطهم مع بعض في برواز كبير وعلقه

25)    اتمهمز يوم وقول العشا عليا .. وربنا يستر عالناس

26)    اعمل اكونت فيس جديد لمدة يوم باسم مجهول وابعت رسالة لحد ما تعرفوش قولة يارب تفرح وتنبسط وتكون مرتاح وحياتك سعيده .. واقفل الاكونت تاني

27)    اعمل ريكورد لصوتك وانت بتتكلم .. وياريت كلامك يكون عن الايدولوجيه الحديثه في تكون الامم المعاصرة

28)    هات صندوق صغير و30 ورقه صغيرين ورقمهم .. وكل شهر .. ابدا بورقه رقم 1 .. ليكن كتبت فيها حستغفر 100 مره .. تاني يوم تاني ورقه .. حقرا سورة تبارك .. وهكذا ..

29)    العب كلاو !!

30) ديه ليك .. حسيبها مفتوحه .. شوف بجد نفسك تعمل ايه .. واستغل هبل الاجازه اووووووي .. واتجنن واتنفس وعيش بقى .. هو البني ادم مننا حيعيش كام مره ؟؟ 

واجازه سعييييييييييده 

في مكنة بهاء ورمزي :D

 

مصطلح مكنة بهاء ورمزي ده حاجه ياريت تعتبرها وهميه اذا قررت تقرا الكلام الجاي .. وما لكش دعوة مين هما بهاء ورمزي دول ..

المكنة ديه هي المكان اللي اكيد في يوم من الايام حلمت بيه انه الجنه اللي بتتحقق فيها كل احلامك وامنياتك بمنتهى السهولة ومن غير ما تعيط لباباك ولا تستعطف مامتك .. بيت الاحلام المعمول من شوكولاته بيضا وبني وعواميده مصاصات وكلاسيه شيبسي وسجاده مستيجه ملونه بتعمل بالونات !!

هو نفس المكان اللي لما كبرت شوية اتمنيت تهربله عشان تخلص من المدرسه اللي كانت بتكرهك وتتلككلك وبتتعمد تكرهك في المدرسه والمذاكره وفي حياتك نفسها وجه على بالي احبسها في بدروم البيت ده واحطلها فيل يرفس فيها لحد اما تموت وانا اقعد في الدور اللي فوق اضحك ضحكتها الشريرة وانتقم شر انتقام ..

هو برضه بيت احلامي اللي في يوم قولت لما اعيش لوحدي في يوم من الايام حاحط في كذا واعمل في كذا وحبة سذاجه على حبه تفاهه مرتبطه بسن المراهقه الملزق المليان حبوب شباب ده .. عديها

وهكذا مع كل مراحل حياتك حيفضل المكان الوهمي الغامض اللي عمرك ما حتروحه شاغل جزء من حياتك .. الجزء ده بيكبر ويصغر حسب احتياجك وجنانك في الحقبه الزمنيه اللي انت بتمر بيها ديه ..

بالنسبه لمكنه بهاء ورمزي فهي حاليا المكان الغامض المجهول اللي اكيد عمري ما حروحه بس حيفضل كل حاجه بتحصل فيه شاغله تفكيري بما في ده من قصص غير مألوفه وغير منطقيه .. وبالنسبه لبهاء ورمزي .. فانا ما اعرفهومش والمصحف

وعلى فكرة يا سلام .. مكنه ديه كلمه عيب جدااااااااااااا عندنا  :P