قايمة ال30 حاجه اللي ممكن تتعمل في الاسبوعين الزياده !!

 

الحمد لله .. ربنا كارم الواحد بحكومة زي الفل حققت مطلبي كواحده من الشعب وبعدتني عن الكليه ال استغفر الله العظيم يارب الواحد مش عايز يغلط   :D

وبما ان الشهر اللي فات ده طااااااار وذهب مع الريح وخرج ولم يعد والخ الخ الخ .. قولت لا بقى طالما ربنا كرمنا باسبوعين .. يبقى لازم نعمل حاجه ان شاء الله كانت حاجه عبيطه او مجنونه او ملهش اي تلاتين لازمه .. تفاصيل كل نقطه وسبب اختياري ليها والهدف منها

حتنزل على صفحه مجلة

PLACEPOOOOOOO

https://www.facebook.com/placebomagazine2017

بعدين حبقى انزلها هنا على رواااااق ..

استعنا عالشقا بالله .. يلا

1)    اكتب قايمة ال30 بتاعتك .. قايمة فيها 30 حاجه انت حتحاول تعملهم وتخلصهم طول ما ربنا مديك عمر .. مش مهم الحاجات ديه تكون مهمه للناس .. المهم تكون بالنسبالك هدف وحلم ونجاح !!

2)    اسمع هشام الجخ .. هويس الشعر .. ايوة بغير   J

3)    هات ورقة .. اكتب فيها الاغاني اللي حتشغلها في فرحك ..

4)    اتفرج على فيلم UP

5)    اتعلم تقول كلمة وحشتني او افتقدتك ب6 او 7 لغات مختلفه ومش معروفة

6)    احفظ او راجع اول 10 ايات من سورة الكهف J

7)    افتح فيديوهات يوجا وحاول تعمل زيهم

8)    خد دوش او شاور س من نوع مختلف

9)    ارجع تاني لايام التسعينات .. بطريقتك

10)    اقرا رواية خان الخليلي .. واستمتع بنجيب محفوظ وبالادب بجد

11)    دور على طريقة رسم العين او الشمعه او اي حاجه وجرب حتى لو ما 

بتعرفش ترسم طول عمرك

12)    حد عدد معين .. ليكن 20 .. وانوي انك خلال الالاسبوعين تصلي 20 ركعه ما بين الضحى وقيام الليل وتكون كل ركعة بدعوة J

13)    خوش المطبخ .. اعمل سينابون .. مش عارف ازاي .. حبقى اقولك ونعك سوا :D

14)    حاول توصل لحد من المدرسين بتوع زمان .. اسأل عليه J

15)    حاول لمدة يوم تستغني عن موبايلك ولاب توبك وياريت عن الاصانصير والمواصلات وعيش يوم من ايام قبيلة قريش .. عيش طبيعي يعني

16)    حط في بالك حتعمل ايه رمضان الجاي J

17)    كل يوم قبل ما تنام افتكر سنه من سنين دراستك في المدرسه ابدا باولى ابتدائي شكل الفصل وصحابك في الوقت ده وهكذا

18)    دور على حد ناسيه من زمان .. اتصل بيه واسال عنه .. واوعده انك حتكررها

19)    افتح يوتيوب .. اتفرج على اي حلقة من برنامج خواطر .. لاحمد الشقيري .. وحتدعيلي J

20)    دور على حاجه قديمه عندك وعيد تدويرها

21)    ازرع حلبة او فول في قطن زي ايام زمان :D

22)    اغاني بتحبها بصوت عالي وغني غني غني مهما كان صوتك زباله .. وامسك الفرشه كانها مايك

23)    ياريت بقى وانت بتغني .. ترقص زومبا .. انت مش حتعرف تضبط ولا حركة بس حتنبسط

24)    دور على صورك وانت صغير .. نقي كام صورة حلوين .. حطهم مع بعض في برواز كبير وعلقه

25)    اتمهمز يوم وقول العشا عليا .. وربنا يستر عالناس

26)    اعمل اكونت فيس جديد لمدة يوم باسم مجهول وابعت رسالة لحد ما تعرفوش قولة يارب تفرح وتنبسط وتكون مرتاح وحياتك سعيده .. واقفل الاكونت تاني

27)    اعمل ريكورد لصوتك وانت بتتكلم .. وياريت كلامك يكون عن الايدولوجيه الحديثه في تكون الامم المعاصرة

28)    هات صندوق صغير و30 ورقه صغيرين ورقمهم .. وكل شهر .. ابدا بورقه رقم 1 .. ليكن كتبت فيها حستغفر 100 مره .. تاني يوم تاني ورقه .. حقرا سورة تبارك .. وهكذا ..

29)    العب كلاو !!

30) ديه ليك .. حسيبها مفتوحه .. شوف بجد نفسك تعمل ايه .. واستغل هبل الاجازه اووووووي .. واتجنن واتنفس وعيش بقى .. هو البني ادم مننا حيعيش كام مره ؟؟ 

واجازه سعييييييييييده 

في مكنة بهاء ورمزي :D

 

مصطلح مكنة بهاء ورمزي ده حاجه ياريت تعتبرها وهميه اذا قررت تقرا الكلام الجاي .. وما لكش دعوة مين هما بهاء ورمزي دول ..

المكنة ديه هي المكان اللي اكيد في يوم من الايام حلمت بيه انه الجنه اللي بتتحقق فيها كل احلامك وامنياتك بمنتهى السهولة ومن غير ما تعيط لباباك ولا تستعطف مامتك .. بيت الاحلام المعمول من شوكولاته بيضا وبني وعواميده مصاصات وكلاسيه شيبسي وسجاده مستيجه ملونه بتعمل بالونات !!

هو نفس المكان اللي لما كبرت شوية اتمنيت تهربله عشان تخلص من المدرسه اللي كانت بتكرهك وتتلككلك وبتتعمد تكرهك في المدرسه والمذاكره وفي حياتك نفسها وجه على بالي احبسها في بدروم البيت ده واحطلها فيل يرفس فيها لحد اما تموت وانا اقعد في الدور اللي فوق اضحك ضحكتها الشريرة وانتقم شر انتقام ..

هو برضه بيت احلامي اللي في يوم قولت لما اعيش لوحدي في يوم من الايام حاحط في كذا واعمل في كذا وحبة سذاجه على حبه تفاهه مرتبطه بسن المراهقه الملزق المليان حبوب شباب ده .. عديها

وهكذا مع كل مراحل حياتك حيفضل المكان الوهمي الغامض اللي عمرك ما حتروحه شاغل جزء من حياتك .. الجزء ده بيكبر ويصغر حسب احتياجك وجنانك في الحقبه الزمنيه اللي انت بتمر بيها ديه ..

بالنسبه لمكنه بهاء ورمزي فهي حاليا المكان الغامض المجهول اللي اكيد عمري ما حروحه بس حيفضل كل حاجه بتحصل فيه شاغله تفكيري بما في ده من قصص غير مألوفه وغير منطقيه .. وبالنسبه لبهاء ورمزي .. فانا ما اعرفهومش والمصحف

وعلى فكرة يا سلام .. مكنه ديه كلمه عيب جدااااااااااااا عندنا  :P

مجانين 2020 !!

شيء من المزاج ... توليفه غنية بالكلمات المتراصه 
جردل من القهوة .. واستلقاء لا يجدر بي ذكر وصفه 

.. ثم تبدأ لعبة الرموز  اتجاه ثابت لفتح ملف (Word)

 ايقاع ثابت صادر من طرق يداي على (keyboard)

صوت نقرة (enter) العالي وفي نظري ..  مدوي
يعلن عن انتهاء جمله .. هي في خيالي صرحا شامخا 
اعيد قرائتها (يا سلام عليكي ابت امرام .. ايه الجمال ده)
او حتى لا (نكدب من اولها ) الاطراء يختلف قليلا في الواقع 
من جديد ... الجمله انتهت .. اعيد قرائتها كما العادة 
مين الهطلة اللي كتبت الكلام ده .. احيانا ابدو كطفله 
بلهاء ساذجه ترتدي زيا سخيفا شعرها مجدول مشدود بقوة
واحيانا اخرى بدينه بخصل متناثرة يمينا ويسارا تنم عن الجنون 
يسعدني الجنون .. يروقني اللاعقل كثيرا .. ثم اعود لرشدي 
ثم اجن .. وهكذا دواليك .. 
التهيؤات .. شقا من حياتي . ومن حياتك ومن حياتهم 
اصنع شخصيات ترافقك يومياتك .. شخصيات تتناسب معك 
تنساب بين ثنيات كيانك .. وتتداخل كما امواج البحر فيما بينها 
شخصيه تصغي لأوامرك واخرى تسعى لرضالك وثالثه تدغدغ اساريرك 
ورابعه تذكرك بجمالك .. اناقتك .. نجاحك .. 
وخامسه وسادسه حسبما انت في حاجه الى 
الفصل السخيف حينما تستفيق .. فلا تجدهم 
اين رفقائي واصدقائي .. بل قد تصل الى اين حبيبتي !!
اين هدايانا المتبادله .. اين الصور التي جمعتنا 
اين ارقام هواتفهم .. اين يسكنون .. اين يعملون .. 
تنغمس في حالة من التيه والضياع والنظرات الشارده في اللاشيء
تصل الى حد اشتياق وربما وحشه
تدرك ما وضعت نفسك فيه .. وتجني ما زرعت مخيلتك 
وتبكي بلا دموع .. وتأكل لكن المذاق كأنه ورق امتحانات بلا حبر !!!
تستفيق تدريجيا .. متوصلا الى نتيجه مذهله
صديقي .. لا داع لاختلاق شخصيات من الفراغ 
لا مكان للتهيؤات ما دمت محاطا بمقومات الحياة المتلخصه في 
القدره على المشي .. والقراءة .. وسماع كلاكس العربيات المزعج 
وتناول الليمون المخلل .. والنوم !! 
انتبه للنوم .. لا تدعه يغلبك ولا داع لان تغلبه 
كونا اصدقاء متساويين .. متعادلين دوما 
متعاوينين على درأ التهيؤات 
ان لم تدرك ما عنيت .. فهنيئا انت لم تعش يوما في حقل تهيؤات 
انت شخص طبيعي تقليدي عام 
وان ادركت .. فهنيئا .. قد تكون من مجانين 2020
وقد نلتقي في احدى جلسات الكهرباء 
وان ادركت بعضه ولم تدرك البعض فكم احسدك فانت مجنون باتزان 
حالم بواقعيه .. مندفع بثبات .. !!!!
(كل ما ذكر ليس خياليا ويمط للواقع بالكثير من الصلات )

تم نشره في العدد الاول من مجلة Placebo

مجلة صيدلة الاسكندرية دفعه 2017

لينك تحميل المجله 

http://www.mediafire.com/download/99c5n98pyy4u7tf/Placebo+Magazine+-+1st+Version.exe

ريشه بتنكش كل شوية !!!

 عن الشخصية الموجوده في حياتك من غير دليل يثبت وجودها .. الشخصيه اللي عمرك ما سمعت صوتها ولا شوفتها .. وممكن ما يحصلش .. وتستمر علاقتك بيها مجرد كام كلمه مكتوبين كل كام يوم .. بس وجوده فارق

فارق يعني .. يعني مؤثر .. يعني ليه دور .. يعني في بصمه بيسبهالك في حياتك وتصرفاتك .. ماضي بقلم حبرة ما بيطلعش انه هنا معاك حتى وانت مش واخد بالك .. حتى وانت مطيور ومجنون ومشغول ووراك ستوميت الف حاجه ..

بس في لحظه فعلا بيجي على بالك .. تحس انك عايز تسال عنه وتعرف اخباره .. تحس انك عايز تحسسه بوجودك انت كمان في حياته زي ما هو عامل فيك  .. تقلده يعني .. غالبا بتكون فاشل .. بس اديك بتحاول وغالبا هو بياخد باله

بتكلم عن الشخصيه اللي بتنصحك من غير ما حتقدر تعرف اذا انت نفذت النصيحه ولا لاء .. من غير ما تستفيد نهائي اصلا سواء نفذت النصيحه ديه اساسا ولا فكست ..

الشخصيه اللي بتحاول تثبتلك انك عندك مواطن قوة وشيء من النجاح واشياء من الهبل في نفس الوقت اللي هي عايشه فيه حياة اللاوجود واللاشيء !!

الشخصية اللي بنسبالي لقيتها .. كأنها

ريشه بتنكش كل شويه

تلجه في قفاك في عز البرد

شعره بتزاولني وانا بسرح

رشه ملح فوق الاكل

لسعه شاي على طرف لساني

رمشه بتدخل جوا عنيا

القصد .. حاجه صغنطوطه تحسسك بيها بالعافيه.. غصب عنك  

عايزة اقول للشخصيه ديه ... شكرا لانك في حياتي بدورك ده وبوضعك ده

J J J J J J

2014 طقس تدويني معتاد

بكتب في اخر 5 دقايق بالضبط .. واكيد السنه حتخلص واللي بعدها تبتدي وانا بكتب الكلام ده مش حألف طقوس وادعي اني بعملها كل راس سنه لاني عمري ما عملت كده .. خالص الحالة .. سقعانه شويه .. لابسه ايس كاب على راسي .. منزعجه الى حد ما من اصوات الصواريخ .. لما بغمض عيني بشوف مركبات بنزين واروماتك .. بحاول اقلل معدل الرمشات

كل سنه بقول السنه الجديده حتبقى احلى .. وتطلع اتقل واصعب من اللي قبلها .. انا نفسي 2014 تبقى هاديه .. مجرد هدوء .. سمع اخبار الحوادث والوفيات والكوارث يقل شويه عشان خلاص نفسيتي باظت .. نفسي الزحمة تقل والترام تبطل تتاخر وشارع شامبليون يقصر شويه وما يبقاش عندي سيكشن الساعه 8 الصبح عشان ما بحبش اصحى بدري بالشكل ده والبالطو يبطل يتبقع البقع الزباله اللي ما بتطلعش و طنط بسمه بتقعد طول اليوم تنضف فيها

(بسم الله .. دلوقتي بدأت السنه الجديده ) ..

ديسمبر .. عدى حلو .. زي كل مره ما بيعدي حلو ..

عيد ميلادي كان حلو .. اول مره اتفاجئ بعيد ميلادي .. يوم ما تكتشف ان ربنا محاوطك بصحاب كلمه صحاب قليله انها توصفهم .. بقى عندي اللي هما جزء من حياتي .. عباره عن مؤثرات بقى ليها دور في تصرفاتي وكلامي وردود فعلي وشكل حياتي حتى بعد ما تعرف انك كنت مفهوم غلط من معظمهم في بدايه معرفتك بيهم .. وحتى برضه لما الاقي اني قصري ده شيء مميز ليا بالنسبالهم  اكتر من اللازم ..  

من نجوى وهي بتحبني وانا عارفه كده كويس بس بتحب بابا اكتر مني وعندها استعداد تبعني عشان كيلو يوستفندي اوي لتر عصير عنب او حتى قرص حواوشي  ..  لمحمد هشام وهو اللي معاه الريموت بتاعي  قبل ما اكتشف ريموته و وسيله تحريكه من مكانه وهي جرجره شنطته على الارض عشان يتزحز .. لسلام وهي بقت جزء من يومياتي وحياتي وبيتي  وبقت تشاركني حتى علاقتي بطنط بسمه .. لمصطفى جمال وهو بيقولي يا خالتي وبياخد مني شغلي بتاعي العملي زي الهبله ..  واصر يفكرني  امبارح بنظرتي عنه من سنه ونص تقريبا وعلى فكره نظرتي كانت صح مش غلط ههههههه لمروة اللي وحشتني وما شوفتهاش 10 مرات على بعض السنه ديه ومش بقدر امنع نفسي من حضنها اول ما بشوفها .. لياسمين محمد وهي كتير بتقول الكلمه قبل ما انا اقولها بثواني .. لسهيله وهي حنينه وطيوبه وكل اما تشوفني تقول ازيك يا بيبي وانا علطول ابص عالمناكير بتاعها .. لمنه وهي بتلفت نظري كل شويه بانتمائي للسعوديه مع كل كلمه او تصرف او حتى حاجه بتتشرى من هناك .. لعرفه اللي حسألة تاني اذا عندهم راس سنه في دمنهور و لاء يمكن السنه ديه يكون عندهم  .. لاهلاوي وهو له عندي باكو شوكولاته عشان السنه اللي فاتت قالي انتي حتعدي وعديت .. لميرنا وهي بتقلش وبتضحكني من غير ما تحس .. للمنصوري وهو فوووق اوي بس بنقدر نسمع بعض الحمد لله .. لعسكري اللي مش عارفه ايه اللي جراله السنه ديه وبقى صامت وعاقل كده !! لساره عبد الراضي وهي بتاكد عليا ما انسهاش في التدوينه ديه للسبكي بعد ما توصلت اخيرا لكلمه توصف كيانه بالنسبالي  وهي انه فيل ازرق .. مع انه مش تخين ولا ازرق ومش حيفهم انا قصدي ايه الحمد لله ..  لخلود وانا مش سايبها في تحضيرات جوازها حتى الطرح كنت معاها وهي بتشتريهم ههههههههههههههههههههه لياسمين حازم وهي عندها حيثيات اهتمام وامومه .. لهاشم وهو مازل صيدلي طفل .. لهند وهي حبيبتي اللي بنيي وبينها كام متر بيفصلوني عن اعمق انسانه عرفتها في حياتي

عايزة اقولكم .. كل سنه وانتم طيبييييييييين ومبسوطين

كل سنه وانتم صحابي واخواتي وريموت كنترول حياتي

يارب السنه ديه تحسسكم بوجودي اكتر .. وتفهموا فيها اهميتي في حياتكم اكتر وتستشعروا فيها الطعم اللي انا عملاهولكو .. وتبطلوا تقولولي شكلك حلو او لبسك شيك عشان انا ببقى عارفه الكلام ده ومالوش داعي كلمات الشكر على التدوينه ديه يلا عدوا الجمايل وانتوا ساكتين ...  يعني كفايه تماحيك بقى لحد كده

عقبال تدوينه السنه الجايه J J J

كلاكيت للمره 19 .. يلا نطفي الشمع

يارب انا عايزاها تبقى سنه حلوة من غير زعل ولا كلاكيع .. واضحك فيها كتير .. واطفي شمعه السنه الجديده وانور شمعه امنيات بسيطه صغنطوطه نفسي تتحقق .. نفسي الاقيني واعرف انا بعمل ايه في الدنيا ديه .. نفسي اعرف اعمل الحاجه اللي تخليني لما اجي انام .. ابقى مستريحه ومبسوطه واقول لنفسي .. عاش يا مرام .. نامي واحلمي حلم جميل واصحي استنيه يتحقق .. واستني معاه ضحكة ايام تعدي بالراحه من غير ندبات ولا علامات مالهاش لازمه ..

يارب خليها سنه مجنونه .. اجري فيها من غير ما اقف واتنطط فيها من غير ما اقع واتكلم فيها من غير ما بسكت واضحك فيها لحد اما قلبي يوجعني ونفسي يتقطع ودموع الضحك تغسل وشي وتنعشه وتفوقه وتصحيه وتقولها خليكي مبسوطه يا ملامح ال19 سنه خليكي بعيون ضيقه فرحانه وغمازة خد شمال بتمضي بسمة ليها ميزه مفرقها عن الباقي ..

يارب خليهم حواليا .. كل اللي بحبهم وبرتاحلهم ووجودهم معايا فارق .. خليهم كل سنه يعيدوني ويقولولي كل سنه وانتي طيبه .. خليهم في ظهري ساندني .. خليهم ورايا يزقوني لقدام .. خليهم ولو بنظره يبعدوني عن الغلط اللي مش فاهماه وفي لحظه غباء يوقفوني ويقولوي فتحي مخك شويتين وفي لحظة جنان يجروا معايا في الشارع تحت الشتاء وهم بيضحكوا ..

يارب قبل ما عيد ميلاداتي تخلص .. خليني اسيب بصمتي .. واقول للعالم فكرتي .. واوضح انا عشت اعمل ايه وعشان ايه وعملته صح ولا ايه .. خليني اعيششها صح واكسبها صح حتى لو حعدي فيها مرور الكرام من غير علامه وجود ولا اثر ..

يارب خليها سنه اعرف اقرب فيها منك اوووي .. وترضى عني فيها اووووي .. وقرب رمضان بقى عشان وحشني اووووي .. وخليني دايما راجعه ليك بذل كامل .. وابات الليله وانا بدعي تهديني وتيسر اموري .. وانام بهدوء واصحى مرتاحه بعد استجابه دعاء طويل .. لانك كريم يارب .. اكرمني بسنه ناجحه وجميله

كلاكيت المره ال19

غمضه ذكريات سريعه

(ماما قاعده فارشه الكتب وانا عيله في تانيه ابتدائي )

يالهوي .. خلاص يا ماما كفايه سمعتيلي الكلام ده 101 مره .. لا فيه حته ما سمعنهاش .. ماليش دعوة .. الابله بكرة حتزعقلك ..

(افكر شوية .. افتكر شكل ابلة تانيه ابتدائي اللي مثلت دول اول دراكولا في حياتي ) اخاف شوية ,, بس ارجع افتكر ..  خلاص جميل وهناء بدأ انا حروح اتفرج عليه دخلي الكتب في الشنطه يلا يا ماما

انتي يا بنننننننننت .. والله جميل وهناء بدأ بقى الله ..

(بابا قاعد بعد الغداء عمال يقلب في القنوات ومش ثابت على ولا واحده )

بابا سيب القناة ديه .. يقلب

طب ديه .. يقلب

الله انا بحب ده .. يقلب

بااااااااااااااااابااااااااااااااااا .. ارجع بسرعه بسرعه

اتنطط شويه .. اعيط شويتين .. ده الحصن يا بابا .. برنامج الحصن يا بابا ..

يرجعهولي .. وانا اضححححححححححك

(صاحيه الصبح بضرب الجزم عشان اروح المدرسه )

ماما تفتحلي بيكاتشو اتفرج عليه قبل ما انزل ..  كان بيصعب عليا اش وصحابه ازاي بيتنقلوا من بلد لبلد مشي يعني ازاااااااااااااي ؟؟؟ بعدين انا دخلت في صراع نفسي بيني وبين نفسي لما قالولي في المدرسه انه حرام بس صراحه انا من السن ده وانا نفسي اماره بالسوء وفضلت اتفرج عليه عاااااااااادي جدا ..

(قبل المغرب )

بابا .. انا عايزة اربعه ريال انزل اشتري حاجات حلوة .. وانا راجع حجيبلك .. لا انا ماليش دعوة عايزة انقي  ... طب هاتي المحفظه من عالكومودينو ... اجري اجيب المحفظة..  افتحها .. اتاكد ان فيها فلوس .. وفيها الاربعه ريال الفكه الي انا عايزاها .. بعدين اقفلها وكأن شيئا لم يكن اديلو المحفظه .. يديني الفلوس .. انزل اشتري ايسكريم وشيبسي ونوعين شوكلاته .. كانت ايااااااااااااام بقى الريال اما كان ريال ..

(مسافرين يوم عرفه رايحين المدينه )

نزلنا في استراحه .. سلمت على ايه .. قالتلي كل سنه اونتي طيبه يا ميرو .. عقبال مليون سنه .. يومها بليل واحنا بنتعشى احتفلت بنفسي عادي جدا .. حطيلت كاتشب على البطاطسات .. وغنيت لفنسي في سنابل

فاكره يوميات ونيس .. وحديث الصباح والمساء

فاكره البرنجلز والشوكلاته التوبليرون والنيسكويك

فاكره ايام استراحات العيد لما كنت اشوف عيال كتير اوي والعب معاهم طول اليوم واروح وانا مش عارفه اسم ولا واحد فيهم

فاكره اول موبايل بابا جابهولي كان لونه احمل بيتقفل بباب لما نجحت في سنه رابعه وطلعت الاولى

فاكره برضه البلاي ستيشن اللي شبطت فيه السنه اللي بعدها وبابا جابه وانا ما كنتش بعرف اعمل فيه اي حاجه

فاكره لما ابتديت احس اني قصيرة وسط صحابي

فاكره كل عيد ميلاداتي والتورتات واصحابي والهدايا

فاكره ماما لما كانت تفكلي الضفيرة وتعملي شعري  يوم الحفله واقولها بصي طوييييييييل ازاي ؟؟

وبابا لما كان يجيب تورته كبيررررررره من جهينه مكتوب عليها اسمي .. ولما كان ياخدني انقي من كتالوج التورتات

المهم  قربت اكمل 19 سنه .. بس مش عارفه بعد كمان 19 سنه حفتكر ايه بالضبط ..

بنت يا مرام .. كل سنه وانت طيبه