حلوة وتستاهل ،،

العيون دايما مليانه كلام ، بمعنى اصح مليانه مشاعر    

مشاعرنا بتبقى فعلا عايزة تتكلم بشفايف عيونا

مشاعرنا تجاه كل اللي حوالينا مهما حاولنا نداريها بتبان

مهما حاولنا نظهر من غير أي تعبيرات تجاههم كلهم ما بنعرفش

في دايما اشعاع مش بيتشاف بيوصل كل حاجه في قلب اللي بيسلم عليك

مهما كان ، حب وكره ودفا وجمود وحنان وقسوة ولهفة وخوف وامان

قلوبنا شايلة كل ده جواها ، قلوبنا بتكبر وبتفرح وبتزعل وبتطمن وبتخاف

يمكن قلوبنا بتشيل اكتر ما تقدر ، بتشيل فوق طاقتها وتتعب

يمكن احنا مش عارفين نتعامل معاها صح ،

او هي اصلا ما كانتش عامله حسابها ان حياتنا زحمة اوي كده

حياتنا فعلا ازحم من ما كل حيثياتنا تقدر تستوعب وتتعايش

بنجري ، طول الوقت بنجري وبنلف حوالين احلام وخطط وحياة عايزنها

بنقابل ناس كتير وبنتكلم ، بنتكلم كتير اوي

ومهما اتكلمنا ، الكلام ده ولا حاجه جنب اللي العيون بتقوله والقلوب شيلاه

محتاجين ننط من مكان عالي ونسايم الدنيا تجمد وترفعنا عشان ما نقعش

محتاجين نغمض عنينا شوية ونبطل نشوف كل حاجة اخدت حيز من حياتنا وهي اصلا حاجات مالهاش لازمة ابدا

محتاجين الطاقة دي  تتفرغ من غير اذى ، احنا مش بنحب نأذي حد

محتاجين اماكن واسعة اوي عيونا ما تجيبش اخرها

محتاجين أنفاس عميقة هواها يكون نقي وريحته حلوة

محتاجين نسمع احسن عشان نحس بقلبنا اكتر ، ناخد بالنا من دقاته

محتاجين نطبطب عالقلوب دي ، لأنها طيبة ومستغربة الدنيا مش شبهنا

محتاجين نحتويها ونحبها وناخد بالنا منها ونحطهم في عنينا

محتاجين ألوان عشان نضمن ان عمر ما العالم يبهت من حوالينا

عمره ما يبقى ابيض واسود والوان كئيبة

  حياتنا حلوة وتستاهل ، واحنا حلوين ونستاهل