كن علاء الاسواني .. كن حميد الشاعري ..

عارف لما تقرا مقال.. رواية .. قصة قصيرة ولا حتى تويته  من غير ما تعرف الكاتب مين بس التفاصيل والمغزى وطريقة العرض والاسترسال والفكر يوصلك ان الكاتب هو د. علاء الاسواني .. كأنه اجبرك تعرفه لانه صاحب لمسة جميلة مميزة .. لمسة بتاعته لوحده .. حتى اللي بيحاولوا يقلدوه بتقفشهم ..بيخليك تشوفه بالعافية .. لان كلامه بيلمع وبينور ..

طب عارف لما تسمع أغنية جديده او قديمة بس من أول حرف بيتغنى بتكون عرفت انه ده حميد الشاعري .. من غير مجهود ولا ثواني تفتكر مين ده ولا اسمممه ايه .. لاء علطول .. ده حميد .. حميد بصوت يمكن غريب يمكن مش مألوف لما تسمعه لأول مره .. يمكن بيخبطك على ذاكرتك تفتكر انك سمعت الرنه ديه قبل كده في اغاني تسعيناتي وانت صغير .. ولما تعجز وتبقى عجوز وتنسى اسامي كل الناس اللي غنت صعب تنساه ...  لان صوته بيلمع وبينور

امشي في سكه  تعرف تنور وتلمع فيها .. امسك في كل حاجه لحد ما تعرف فين مكانك بالضبط .. مش سهل ومش بسيط ان يكون حاجه ليك لوحدك ما حدش يعرف يعملها زيك بس جرب يمكن تضبط .. اكتب غني اعزف إلعب كوره سجل فيدوهات اطبخ اعمل الحاجه اللي اتخلقت وانت المفروض بتعرف تبدأها وكملها ..

كملها ..

إلمع ...

نوَّر ....