وحشتني اوي :(

تعرف انك واحشني اوي

مفتقداك بطريقه بشعه بجد

نفسي اصحى الصبح الاقيك قاعد في البلكونه بتشرب القهوة

ولا اصحى متاخر حبتين الاقيك راجع من برا ومعاك الجرايد

ولا اسمع صوتك وانت بتقول يلا البسوا حاخرجكم

ولا حتى في يوم ابقى متعكننه فاختلف معاك ونشد سوا

أي حاجه وانا معاك نفسي فيها

كل حاجه ملهاش طعم من غيرك

البيت وحش اوي وانت مش فيه

والعيد كان وحش اوي من غيرك

والعيديه اللي بعتهالي ما كانش ليها طعم لاني

ما نتشتهاش من ايدك بسرعه واديتك بوسه من هنا ومن هنا

عايشه على صوتك معايا في التليفون

وعلى سؤالك عليا كل شويه

انا عارفه انك خايف عليا وانا هنا لوحدي ..

بس والله انا تمام .. تمام جدا

كنت بقلب في الصور

لقيتك الصورة ديه في فرح ميرا

جه على بالي لحظه ما خلتني ارقص سلو معاك

ولحظه ما قولتلي قبلها فستانك شيك اوي يا مرومه

رجعت ورا اكتر

يوم نتيجه القدرات .. فاكرها ؟؟

فاكر لحظه ما اتصلت بيك وقولتلك جبت 98 % يا بابا بصوت عالي اوي

وقولتلي مبروك يا حبيبتي ؟؟

وروحت بسرعه وحضنتني جامد

يومها حسيت اني اخيرا وصلت لرضاك

اخيرا قدرت اعمل حاجه تخليك فرحان ومرتاح من نحيتي

حسيت بانجاز اكبر من النتيجه وتوابعها

فاكر يوم سفرك انا كنت عامله ازاي ؟؟

ما كنتش عارفه اتخيل انا حقعد ازاي من غيرك

ودلوقتي انا فعلا ولا حاجه من غيرك

ولاول مره مش عارفه اكتب بالعربي

وانا عارفه انك ما تعرفش حاجه عن زحمه

وممكن عمرك ما تقرا الكلام ده ولا يوصلك

ولا تاخد بالك من كلامي معاك قد ايه انت واحشني

بابا .. انا بحبك اوي .. اوي اوي اوي اوي

ومش قادره استنى اجازة نص السنه علشان اجيلك واشوفكم كلكم

ومعلش سامحني مقدما

انا ناويه اعمل مشهد درام في المطار او ما اشوفك

حجري عليك بسرعه واحضنك جامد اوي

وما تقوليش بقى الناس ولا المنظر ولا كده

الناس مش عارفين انا مفتقداك قد ايه

يا حبيبي انت ..