دائرتي..

ان تكون شخصا يمثل نقطة في دائرة الاشخاص المحيطين بي ..

جزءا مؤثرا في بقاء الدائرة تحتفظ بشكلها المنتظم ..

 تدور .. وادور انا بينكم .. وادور كوني نقطة في دوائركم .. 

اتركني في حضرتك ابدو كما انا .. 

بﻻ اقنعة ..

ﻻ داع لكلمات لبقة متملقة .. فلنعترف ..

بضع دقائق من مواجهة النفس .. ان نكون معا كما نكون امام المرايا .. 

اجعلني أضحك واتحدث و ابكي واستاء واعبر كما اعتدت دوما بﻻ تكلف بﻻ تصنع

امنحني الانطﻻق .. حرية كوني ما يجب علي ان اكون بطفولتي .. ونضجي

بقلبي .. وعقلي 

بخيالي.. و واقعي

بسذاجتي .. ودهائي

بغبائي.. وعبقريتي 

بكل ما يكونني ويحتويني 

اخرج من دائرتي اذا لم تفعل .. 

احسن اختيار نقاط دائرتك .. 

فإن غيروك وأعادوا تشكليك او وجدت نفسك مختلفا امامهم . . ﻻ تعطيهم حق البقاء .. ﻻ تتزيف

وامنح نفسك حق الفطرة والتكوين 

دفـــاعـــا عـن العـمـــق ..

مستاءة جدا من فكرة ان العمق بقى مجال لوصف اي حاجه .. بعدين بقى مجال للسخرية من اي حاجه ..

وان كلنا بقينا على قدر من العمق في كل حاجه واي حاجه بنعملها .. حاجه سطحية جدا ..

بحس العمق اعمق بكتير من اننا نكون فاهمينه ونبتدي نوصف بيه الناس والتفكير والتصرفات ..

كونك بتصحى بدري تشرب قهوة سادة وتسمع فيروز ده حالة حلوة بس مالوش دعوة بالعمق ..

وكون عندك فكر سياسي وآراء في كل حاجه ده اتطلاع جيد على الاوضاع لكن من عمق ..

كونك بتكتب تويتات وبوستات حلوة ده خيال واسع خلاق بس برضه مش عمق ..

على فكرة قرايتك ل 24 كتاب على الاقل في السنه تغذية جامدة لعقلك وروحك ,, مش عمق

وبالمناسبة اللي بيقروا لاحمد مراد معظمهم شدهم الكلام الجامد عن الروايات فهم مش عميقين ولا حاجه ..

ببساطه من غير اي محاولة لجعل التدوينة ديه عميقه من نوعها ..

ممكن تكون بتشرب ينسون وبتتمزج لما تسمع عدوية ومش متابع اخبار الدنيا اساسا ومش قارئ جيد بس

بتخطط بقوة لليوم اللي حتعمل فيه حاجه عمر ما حد عملها قبلك ..

او حتفكر في حاجه عمر ما حد فكر فيها زيك وبطريقتك ..

زي يوم ما اتسأل ليه التفاحة وقعت .. مش يا سلام وقعتلي تفاحة

قررت استميت دفاعا عن العمق من سطحيتنا .. مش كل ما نتزنق في وصف نقول المعنى العميق للجملة

والوصف العميق للشيء .. والشخص العميق في مكانه

ممكن نعيش ونموت من غير ما نوصل للعمق اساسا

بس ممكن نحيا حياة كاملة من غير سطحية تافهه ساخرة من كل حاجه فوق مستوى استيعبنا

سيبوا العمق في حاله رجاء ً...

فرصــــــــــة

الفرصة عمرها ما حتجي يوم تقولك انا اهووو

الفرصة شخص دايما متخفي مش باين ومش واضح وعمرك ما حتكتشفه بسهوله

محاطة دايما بغموض غريب .. الفرصه ما ينفعش تكون سهلة

وحتى لو زي الشمس .. فمن كتر نورها مش حتاخد بالك منها برضه

فكرة وجودها ببساطه من غير تعب يخليها ماسخة ومالهاش طعم

الفرصه لازم توجعك شوية قبل ما تلاقيها .. عشان بعد كده طعم اللقا يشفي

تدوخك وراها وانت محبط ويائس والدنيا مضلمة عشان فجأة الدنيا تنور بسببها

الفرصة بيسبقها فشل .. عشان تحلى لذة النجاح بعدين

وبيجي وراها كل اشكال الامل اللي واجب عليك تنشره وسط الناس اللي كانو زيك محبطين

الاحباط لا إرادي .. واحساس مزعج وسخيف

محتاج دايما اللي يحاوطه بكلام شبه حتلاقي فرصتك اكيد

انت بس قوم واجتهد واشتغل

احتياجنا دايما للفرصة عمره ما حينتهي

محتاجين لفرص في كل حاجه في حياتننا

عشان نتغير مع ناس ما يستاهلوش .. وعشان نصالح ونراضي ناس تانيين

عشان نلاقي نجاحنا في حاجات مهما كانت بسيطه

عشان نقرب من كل حاجه حلوة ربنا مخبيهالنا

عشان نكون احنا زي ما اتخلقنا .. فرصه عشان نرجع على قد ما نقدر على فطرتنا

الفطرة اللي ما بتعرفش تكره ولا تكيد ولا تنتقم

يالله

لو لينا فرصه نتغير للاحسن .. او ننجح .. او نراجع حسابات

ارزقنا بها وقربها مننا 

كبرتي يا زحمة !!!

بشوية كلام بسيط على شوية افكار ابسط ومن غير اي داعي لتزويق الكلام وكتره بس انا عايزة اتخيل بجد ان زي انهارده من 3 سنين فاتو كنت لسه مخلصه امتحانات ثانوي علطول قررت افتح البلوج دي .. حسيتني عندي طاقة واتمنيت يبقى عندي ايام اعرف احكي عنها وصحاب اتكلم عنهم وحاجات كتير تيجي على بالي وتدون .. من يومين وانا بلف في التدوينات اللي فاتو .. روحي حاسيتها اتشكلت .. افتكرتني في كل وقت عدى عليا واتدون هنا .. حسيتني وانا عندي 17 سنه في اول كام تدوينه .. وانا متضايقة ايام تنسيقي ولحظات التخبط الكتير اللي عدت عليا في اول سنه .. اوقات حسيتني ناضجه وغيرها حسيتني طفلة .. اخدت قرار اني حدون اكتر .. حاكتب واكتب واكتب .. بدل ما الوقت يتسرق مني وذاكرتني تيجي يوم وتخوني وما اقدرش افتكر ايامي اللي انا عايشاها

زحمة افكاري وحياتي وايامي

زحمة خناقاتي جوا نفسي

زحمة شوارع بمشي فيها في خيالي والناس تخبط فيا

زحمة حاجات كتير لازم يتداس عليها وتتتنسى

زحمة حاجات اكتر حلوة وحتتعاش

الزحمة جواك وبتحركك

الزحمة روح وحياة وقلب بينبض

عيدك عيدي يا زحمة ..

كل سنه وانا بدون

وادون

وادون

وادون 

أن تنهي ما تقول بـ (آمين)

نسمات رقيقة للغاية .. تبعث في النفس هدوءاً ينساب بين ثنيات النفس

يدفعك نحو اللجوء إلى كل شيءٍ يغمرك بالطمأنينه

النظر إلى السماء .. تتنفس بعمق

نغمات غريبة المسمع .. تمتزج بابيات الغزل العفيف الحر

يغمرني شعور بالبهجة الحذرة .. يشوبها بعض ذكرى مزعجة

لم تخني ذاكرتي حتى الان ..

ربما ستفعلها يوما ..

اللهم هب لي ذاكرة لا تؤذيني ولا تؤلمني

اللهم ارزقنا الحب  والقلب العامر المطمئن

اللهم قنا كل أشكال الكره والبغض

ارزقنا الحياة .. بكل معاني الحياة

ارزقنا الرضا الذي يجعلنا نمتلك كل ما نريد

ارزقنا حياء بلا نفور

وكياسة بلا خبث

وعلما بلا غرور

اللهم قربنا إلى كل جميل

وفاجئنا دوما بكل ما نريد ونتمنى

مُنَّ علينا بالبهجة

بالبسمة

وباليقين 

آمــــين 

نجوى .. يا احلى عيد

نجووى .. يا اجمل ضحكة قابلتها في حياتي

انا مقتنعة ان من غيرك ومن غير وجودك وسطنا كنا عمرنا ما اتلمينا اصلا

انا فاكرة اول سنه في الكلية .. لما كل واحد فينا كان جاي من حته وما يعرفش حد

وماشي في الكليه وحيد وتايه ومكتئب .. مجرد ظهورك غير كل حاجه

فجأة وفي أقل من شهر بقينا شلة انتي روحها وأساسها

احنا كلنا مدينين ليكي بالحاجه ديه .. مدينين ليكي بصداقتنا وعلاقتنا ببعض وقربنا

مديينين ليكي بالذكريات اللي حنفتكرها .. وبالايام اللي لسه حنعيشها سوى

بكل حاجه حلوة فيكي

بدفاكي وحنانك واحتوائك وطيبتك وروحك وقلبك 

بحضنك واشتياقك وعتابك

بكل حاجه انتي بس بتعرفي تعمليها

وكل احساس انتي بس بتوصليهولي

بكل ايامنا ولحاظتنا وصورنا واعيادنا

بكل حاجه انتي طعمها وجمالها ونقائها

كل سنه وانتي معانا وووسطنا وروحنا وضحكتنا

كل سنه وانتي بالف الف خير

يارب يارب كل عيد يبقى احلى من اللي قبله

ويارب يفضل اختلافنا وخناقنا هو اكبر سبب يخلينا نفضل صحاب طول العمر

كل سنه وانتي حبيبتي 

لذة التدوين بعد نص الليل

لذة كل حاجه بتتعمل مش في وقتها .. 

وقت ما تبقى عايز تتكلم وتغني مع ان زورك ملتهب 

وتبقى عايز تجري وتتنطط مع ان رجلك بتوجعك 

مبسوط وانت بتصرف فلوسك مع انك عارف حتحتاجهم بعدين

وقت ما النوم بيبقى جميل ومريح وانت وقتك ضيق ووراك مليون حاجه

وقت ما الكﻻم يحلو اووي والمواضيع ما تتقفلش مع ان وراك امتحان ومستقبلك بيضيع

الشكوﻻته اللي حتموت عليها مع انك عمرك ما كان ليك تقل عليها .. اصلك عامل دايت !

لذة التعب وقت الراحة 

ولذة الراحه وقت التعب 

لذة الكﻻم وقت ما المفروض نسمع

ولذة الصمت وقت ما المفروض تتكلم 

لذة اللعب وقت الشغل 

لذة الصوت العالي وقت الهدوء 

لذة الصورة المخطوفة في ثانيه وصحابها مش حاسين

لذة الخناقة 

لذة الاختﻻف 

لذة نقاشنا لما يشد 

لذة كل حاجه مش مفروضة 

كل حاجه مش ﻻزم تخنقنا وﻻ تقيدنا 

كل حاجه اتقال عليها ﻻزم و واجب ومفروض 

لذة التدوين بعد نص الليل :)