فرغت العناوين

ولنــــــــــا عـــــــــودة ،،، 

سافر حتى لو خيال :)

السفر احتياج ، احتياج محتاجينه حتى لو مش مدركين

محتاجين المسافات البعيدة وساعات طويلة احنا فيها طلعنا من بيت بس ما وصلناش التاني

محتاجين مكان تاني ،  وفكر تاني ، وناس تانية

محتاجين احساس يا مسهل نوصل بقى

محتاجين لحظات وداع ساعات

محتاجين دموع وداع ساعات

محتاجين تعب قبل السفر وتعب بعد السفر

السفر نفس عميق هواه نضيف بيتشعب ويوصل لاخر نقطة في صدرك

السفر قلب كبير طيب دقاته بتعزف حاجات حلوة مالهاش اسم

السفر ضحكة عالية صوتها وصل كل الدنيا

السفر في خيالك متاح ، درجة اولى

في خيالك شوف دنيا تانية وناس تانية

اتفرج ، مش زي عندنا خالص

حقك الخيال على فكرة

حقك جدا ،

حضر شنطتك

اوعى تنسى حاجة . او تنسى احلامك ، طبقها صح عشان ما تتكرمش

ما تسألش مجربين ولا حاجه

استكشف انت لوحدك يمكن تلاقي حاجات احلى

اها ، في حاجات احلى وهي خيال :)

عن حكايات الجمال

الحكاية طويلة ومن زمان ..

من ساعة اخر مرة بطلنا فيها ما ناخدش بالنا من اللحظة اللي راحت وما رجعتش ،

والذكرى اللي لا حتتكرر ولا حتتنسي ..

من ساعة ما بدأنا نعي وندرك وندقق في تفاصيل بتجيب أرق

ونلاحظ ان الساعات أقصر من ما كانت 

وبتعدي أسرع مننا ومن ما احنا محتاجين ....

الحكاية بتحكي عننا لما معنى الحرية خلانا نختلف، انا مش شبهك واحنا الاتنين مش شبههم بفكر بلون مش لونك وبتعبر بطريقة انا ما فهمتهاش وغلط بالنسبالي صح وصح بالنسبالك غلط ، في آخر انت حاسس بيه واخد بالك منه ولا لاء ؟؟ محترمه وحافظ مكانه جنبك ومعاك ولا لاء ؟؟  التفرقة ما بين الدعوة وعدم التدخل ؟؟ التقبل والاعتراض على حاجات ما ينفعش تكون موجوده ؟؟ الحرية بمختلف تعبيراتها واحنا احرار نشوفها ازاي !!

منقبة وحاطة كحل ..

محجبة حجاب جميل بس كل ده مكياج .. ليه كده

عامله فيها محجبة وهي نص شعرها بره اساسا

طب هي عشان مش محجبه تقوم تلبس لبس اوفر اوي كده مفيش وسط يعني

القدرة على التعليق وتركيب الناس اخطاء واللف والدوران المهم ان في الاخر انا تمام انا كويسه والناس غلط ومش فاهمة ومش صح اللي بيعملوه ..

اسهل حاجه في الدنيا تتصيد عيوب ،وتظهر ملاك حواليك نور ابيض من فرط الاستقامه والتنوير ،

فكرت ان صحابك اللي انت عارفهم كويس مش بتعلق عليهم ، لانك عارفهم ، عرفت حياتهم كانت عامله ازاي وسط اهلهم وفي طفولتهم ، فاهم حيثيات نشأتهم ، واصلك بوضوح هم ليه بيلبسوا كده وبيتصرفوا كده وبيتكلموا كده ؟؟

طب اخدت في اعتبارك الطبع ، الحاجات اللي بنتخلق اصلا مقتنعين بيها ومتشكلة جوانا ، انت مش زي اخوك واختك ، مع انكم عشتوا نفس الحياة ومرت عليكم نفس الظروف بس كل واحد اتخلق بجزء من شخصيته متكون ومتشكل ، بطباع صعب تتغير وتتعدل ،

بتحط كل الحاجات دي في اعتبارك قبل ما تقرر تحكم على حد ،

البنت المنتقبه والمحجبة اللي حاطه مكياج واللي بشعرها بس لبسها مستفز ، كلهم اكيد عديت قدامهم وانتقدوني ، بمنتهى السهولة لقوا حاجات كتير يعيبوا فيها ،

للحظه قولت ، انا مش حتحاسب عن حد والعكس

انا مش عايشه مكان حد والعكس

انا مش حد غيري وبرضه العكس

اما تعيش بمبدأ ان كلنا بشر الغلط بالنسبالنا حق وفطرة

وتكمل بمدأ ان النوايا بتحسم كل جدل في الاخر

وتستوعب حقيقة ان كلنا حنعيش في ارض احلام ملونة لما نبطل ندي نفسنا حق الحكم على الناس اللي نعرفها قبل اللي ما نعرفهومش

مش حتبقى ملاحق على كم السلام الداخلي والامان الروحي اللي حتحس بيه

اما تمشي ما حدش منتقدك ولا انت فكرت تركز عشان تاخد بالك من حاجه تنتقدها وتحكم عليها حتلاقي عجلة كانت مصدية رجعت تدور

وعقول كانت مضلمة نورت ، وعيون كانت معمية وفتحت

الحياة مش رخيصة واحنا فعلا لازم نديها قيمة ونعملها حساب

بس من وجهة نظر اننا بنعيش مره واحده ،

حقنا نعمل حسابنا في حياة راقية

حياة من غير انوف بتدخل في صميم حياة مش حياتها

.

.

الحكايات داخله في بعضها

جزء منها راح بعيد مع اللي راحوا

وجزء جاي مع الراجعين

وجزء حابب يعيش جوانا يتكلم باسمنا

وجزء تاني قاعد معانا بيحكي عننا

واجزاء ضاعت مش لاقينها

واجزاء صغيرة مستنينها لما تكبر

وحكايات الجمال مالهاش اخر

جمال الكتابة والكلام

وجمال العيون لما تتلاقى وقت ما سمعنا الصوت

وجمال قلبي لما دق على الحكاية

وجمال قلبك لما سمعها مني

يا حكايات الجمال ،، استخبي جوا قلبي .. 

خُلقنا قوارير ... فرفقاً

خُلقنا لنمضي ونسير ولتعبث الرياح في خصلات الشعر  

خُلقنا آسرات جميلات او مقبلات على التجمل او موقنات بالجمال

خُلقنا ذوات كيد لن يتهاوى ولن يضمحل

خُلقنا مكتملي العطف والعطاء والحنان والأمومة

خُلقنا عفيفات ذوات حياء وحمرات خجل

خُلقنا دمجاً بين الصبر والضجر

خُلقنا للألم والبكاء وساعات القلق والفزع

خُلقنا فاتنات حتى بنظرات الأعين الذابلة

خُلقنا لحرب بين المشروع والممنوع

خُلقنا بضحكات تتراقص لها القلوب

خُلقنا سكينة ومأوى وملاذ حالم

خُلقنا لندعم وندفع ونصنع خطوط النهايات الباهرة

خُلقنا للغض لا للتفحص

خُلنا لنكون لا لننعدم

خُلقنا كالألوان تغير الملامح

خُلقنا احتواءً

خُلقنا دفئاً

خُلقنا قلباً

خُلقنا حياةً

خُلقنا قوارير ... فرفقاً

الاسود يليق بـنـا !!

النهايات السعيدة دائما مملة .. والنوايا الحسنة غير منطقية وإن وجدت فهي لا تصنع أحداثا مختلفة ذات تأثير ..

المشكلات تمتلك مذاقا خاصا وتضيف نكهة لا تفعلها الروتينيات ..

في فنون كتابة القصة لابد من أزمة ما تدور حولها الأحداث .. هناك كاتب تقليدي يبحث عن ابتسامتك في النهاية ذات القبلة الحارة أو حفل الزفاف أو حياة بعد عدة سنوات وعدد من الاطفال في كادر وردي اللون مصطنع كاذب ..

وهناك كاتب مبدع  أكثر شرا بإمكانه إسعادك طوال الوقت ليختتم بهدف أقوى .. دموعك او غضبك او استياءك .. كونك انفعلت إلى هذا الحد فذاك نجاح !! تلك مشاعر تليق بنا ..

الاسود يلق بنا بشده.. فالموت واقع

والاشخاص في أماكن بعيده مُفتقدون إلى حد ضخم ..

والفشل محتوم .. لا ينجح الجميع

والإكتئاب مجرم .. متسلح بهرمونات متسلطه تُسيرنا ..

التراجيديا تروقنا .. هي تعطينا حق البكاء دون الافصاح عن الاسباب ..

البكاء لائق .. حد الفرح له دموع صادقة ..

بينما الهموم المضحكة .. ضحكاتها زائفة..

الاسود مسيطر ببسمة عملاقة وتأثير فاحش

لن يجاريه الابيض المتفائل النقي .. أو الالوان المشرقة الضعيفه ..

وكما تشرق الشمس كل يوم .. تغرب أيضا كل يوم ...

تاركة ظلام بقمر كاذب يسترق أضوائا ليست له

ليللا مخيفا يستميل الاعين لتخيل كل ما هو مخيف .. مرعب.. مفزع

ثق بي .. الواقع مؤلم

والحقائق إن لم تُتجمل فهي قبيحة

ثق بالاسود .. كم هو بشع .. كم هو صادق !!

دائرتي..

ان تكون شخصا يمثل نقطة في دائرة الاشخاص المحيطين بي ..

جزءا مؤثرا في بقاء الدائرة تحتفظ بشكلها المنتظم ..

 تدور .. وادور انا بينكم .. وادور كوني نقطة في دوائركم .. 

اتركني في حضرتك ابدو كما انا .. 

بﻻ اقنعة ..

ﻻ داع لكلمات لبقة متملقة .. فلنعترف ..

بضع دقائق من مواجهة النفس .. ان نكون معا كما نكون امام المرايا .. 

اجعلني أضحك واتحدث و ابكي واستاء واعبر كما اعتدت دوما بﻻ تكلف بﻻ تصنع

امنحني الانطﻻق .. حرية كوني ما يجب علي ان اكون بطفولتي .. ونضجي

بقلبي .. وعقلي 

بخيالي.. و واقعي

بسذاجتي .. ودهائي

بغبائي.. وعبقريتي 

بكل ما يكونني ويحتويني 

اخرج من دائرتي اذا لم تفعل .. 

احسن اختيار نقاط دائرتك .. 

فإن غيروك وأعادوا تشكليك او وجدت نفسك مختلفا امامهم . . ﻻ تعطيهم حق البقاء .. ﻻ تتزيف

وامنح نفسك حق الفطرة والتكوين 

دفـــاعـــا عـن العـمـــق ..

مستاءة جدا من فكرة ان العمق بقى مجال لوصف اي حاجه .. بعدين بقى مجال للسخرية من اي حاجه ..

وان كلنا بقينا على قدر من العمق في كل حاجه واي حاجه بنعملها .. حاجه سطحية جدا ..

بحس العمق اعمق بكتير من اننا نكون فاهمينه ونبتدي نوصف بيه الناس والتفكير والتصرفات ..

كونك بتصحى بدري تشرب قهوة سادة وتسمع فيروز ده حالة حلوة بس مالوش دعوة بالعمق ..

وكون عندك فكر سياسي وآراء في كل حاجه ده اتطلاع جيد على الاوضاع لكن من عمق ..

كونك بتكتب تويتات وبوستات حلوة ده خيال واسع خلاق بس برضه مش عمق ..

على فكرة قرايتك ل 24 كتاب على الاقل في السنه تغذية جامدة لعقلك وروحك ,, مش عمق

وبالمناسبة اللي بيقروا لاحمد مراد معظمهم شدهم الكلام الجامد عن الروايات فهم مش عميقين ولا حاجه ..

ببساطه من غير اي محاولة لجعل التدوينة ديه عميقه من نوعها ..

ممكن تكون بتشرب ينسون وبتتمزج لما تسمع عدوية ومش متابع اخبار الدنيا اساسا ومش قارئ جيد بس

بتخطط بقوة لليوم اللي حتعمل فيه حاجه عمر ما حد عملها قبلك ..

او حتفكر في حاجه عمر ما حد فكر فيها زيك وبطريقتك ..

زي يوم ما اتسأل ليه التفاحة وقعت .. مش يا سلام وقعتلي تفاحة

قررت استميت دفاعا عن العمق من سطحيتنا .. مش كل ما نتزنق في وصف نقول المعنى العميق للجملة

والوصف العميق للشيء .. والشخص العميق في مكانه

ممكن نعيش ونموت من غير ما نوصل للعمق اساسا

بس ممكن نحيا حياة كاملة من غير سطحية تافهه ساخرة من كل حاجه فوق مستوى استيعبنا

سيبوا العمق في حاله رجاء ً...