كلاكيت للمره 19 .. يلا نطفي الشمع

يارب انا عايزاها تبقى سنه حلوة من غير زعل ولا كلاكيع .. واضحك فيها كتير .. واطفي شمعه السنه الجديده وانور شمعه امنيات بسيطه صغنطوطه نفسي تتحقق .. نفسي الاقيني واعرف انا بعمل ايه في الدنيا ديه .. نفسي اعرف اعمل الحاجه اللي تخليني لما اجي انام .. ابقى مستريحه ومبسوطه واقول لنفسي .. عاش يا مرام .. نامي واحلمي حلم جميل واصحي استنيه يتحقق .. واستني معاه ضحكة ايام تعدي بالراحه من غير ندبات ولا علامات مالهاش لازمه ..

يارب خليها سنه مجنونه .. اجري فيها من غير ما اقف واتنطط فيها من غير ما اقع واتكلم فيها من غير ما بسكت واضحك فيها لحد اما قلبي يوجعني ونفسي يتقطع ودموع الضحك تغسل وشي وتنعشه وتفوقه وتصحيه وتقولها خليكي مبسوطه يا ملامح ال19 سنه خليكي بعيون ضيقه فرحانه وغمازة خد شمال بتمضي بسمة ليها ميزه مفرقها عن الباقي ..

يارب خليهم حواليا .. كل اللي بحبهم وبرتاحلهم ووجودهم معايا فارق .. خليهم كل سنه يعيدوني ويقولولي كل سنه وانتي طيبه .. خليهم في ظهري ساندني .. خليهم ورايا يزقوني لقدام .. خليهم ولو بنظره يبعدوني عن الغلط اللي مش فاهماه وفي لحظه غباء يوقفوني ويقولوي فتحي مخك شويتين وفي لحظة جنان يجروا معايا في الشارع تحت الشتاء وهم بيضحكوا ..

يارب قبل ما عيد ميلاداتي تخلص .. خليني اسيب بصمتي .. واقول للعالم فكرتي .. واوضح انا عشت اعمل ايه وعشان ايه وعملته صح ولا ايه .. خليني اعيششها صح واكسبها صح حتى لو حعدي فيها مرور الكرام من غير علامه وجود ولا اثر ..

يارب خليها سنه اعرف اقرب فيها منك اوووي .. وترضى عني فيها اووووي .. وقرب رمضان بقى عشان وحشني اووووي .. وخليني دايما راجعه ليك بذل كامل .. وابات الليله وانا بدعي تهديني وتيسر اموري .. وانام بهدوء واصحى مرتاحه بعد استجابه دعاء طويل .. لانك كريم يارب .. اكرمني بسنه ناجحه وجميله

كلاكيت المره ال19

غمضه ذكريات سريعه

(ماما قاعده فارشه الكتب وانا عيله في تانيه ابتدائي )

يالهوي .. خلاص يا ماما كفايه سمعتيلي الكلام ده 101 مره .. لا فيه حته ما سمعنهاش .. ماليش دعوة .. الابله بكرة حتزعقلك ..

(افكر شوية .. افتكر شكل ابلة تانيه ابتدائي اللي مثلت دول اول دراكولا في حياتي ) اخاف شوية ,, بس ارجع افتكر ..  خلاص جميل وهناء بدأ انا حروح اتفرج عليه دخلي الكتب في الشنطه يلا يا ماما

انتي يا بنننننننننت .. والله جميل وهناء بدأ بقى الله ..

(بابا قاعد بعد الغداء عمال يقلب في القنوات ومش ثابت على ولا واحده )

بابا سيب القناة ديه .. يقلب

طب ديه .. يقلب

الله انا بحب ده .. يقلب

بااااااااااااااااابااااااااااااااااا .. ارجع بسرعه بسرعه

اتنطط شويه .. اعيط شويتين .. ده الحصن يا بابا .. برنامج الحصن يا بابا ..

يرجعهولي .. وانا اضححححححححححك

(صاحيه الصبح بضرب الجزم عشان اروح المدرسه )

ماما تفتحلي بيكاتشو اتفرج عليه قبل ما انزل ..  كان بيصعب عليا اش وصحابه ازاي بيتنقلوا من بلد لبلد مشي يعني ازاااااااااااااي ؟؟؟ بعدين انا دخلت في صراع نفسي بيني وبين نفسي لما قالولي في المدرسه انه حرام بس صراحه انا من السن ده وانا نفسي اماره بالسوء وفضلت اتفرج عليه عاااااااااادي جدا ..

(قبل المغرب )

بابا .. انا عايزة اربعه ريال انزل اشتري حاجات حلوة .. وانا راجع حجيبلك .. لا انا ماليش دعوة عايزة انقي  ... طب هاتي المحفظه من عالكومودينو ... اجري اجيب المحفظة..  افتحها .. اتاكد ان فيها فلوس .. وفيها الاربعه ريال الفكه الي انا عايزاها .. بعدين اقفلها وكأن شيئا لم يكن اديلو المحفظه .. يديني الفلوس .. انزل اشتري ايسكريم وشيبسي ونوعين شوكلاته .. كانت ايااااااااااااام بقى الريال اما كان ريال ..

(مسافرين يوم عرفه رايحين المدينه )

نزلنا في استراحه .. سلمت على ايه .. قالتلي كل سنه اونتي طيبه يا ميرو .. عقبال مليون سنه .. يومها بليل واحنا بنتعشى احتفلت بنفسي عادي جدا .. حطيلت كاتشب على البطاطسات .. وغنيت لفنسي في سنابل

فاكره يوميات ونيس .. وحديث الصباح والمساء

فاكره البرنجلز والشوكلاته التوبليرون والنيسكويك

فاكره ايام استراحات العيد لما كنت اشوف عيال كتير اوي والعب معاهم طول اليوم واروح وانا مش عارفه اسم ولا واحد فيهم

فاكره اول موبايل بابا جابهولي كان لونه احمل بيتقفل بباب لما نجحت في سنه رابعه وطلعت الاولى

فاكره برضه البلاي ستيشن اللي شبطت فيه السنه اللي بعدها وبابا جابه وانا ما كنتش بعرف اعمل فيه اي حاجه

فاكره لما ابتديت احس اني قصيرة وسط صحابي

فاكره كل عيد ميلاداتي والتورتات واصحابي والهدايا

فاكره ماما لما كانت تفكلي الضفيرة وتعملي شعري  يوم الحفله واقولها بصي طوييييييييل ازاي ؟؟

وبابا لما كان يجيب تورته كبيررررررره من جهينه مكتوب عليها اسمي .. ولما كان ياخدني انقي من كتالوج التورتات

المهم  قربت اكمل 19 سنه .. بس مش عارفه بعد كمان 19 سنه حفتكر ايه بالضبط ..

بنت يا مرام .. كل سنه وانت طيبه 

كـــــلام (+18)

انهارده طول اليوم بفكر في موضوع عيد ميلادي .. عيد ميلادي الجاي مش عاطفي خالص .. محشور وسط الامتحانات وحكمل فيه رقم مش عاطفي برضه .. هو ايه 19 سنه ديه ؟؟ رقم رزل كده .. يارب اكمل 20 بسرعه بقى عشان مش طول السنه الجايه افتكر ان عندي 19 بقى وكده ؟؟  وبما ان 19 رخم .. يبقى اكيد السبب ان 18 كان مميز ؟؟؟

يمكن عشان موضوع +18 بقى وكده .. آآآآآآآآآآآآآآآ تعالى نفكر بصوت واطي عشان ديه حاجات عيب .. ايه موضوع +18  .. الا هما ليه نقوا ال18 بالضبط ؟؟ يعني ليه مش 17 .. ايه الحاجه اللي عند البني ادم اللي عنده 18 سنه مش عند اللي عنده 17 او 16 يعني ؟؟ هو مش الاوقع برضه انه كان يكون 21 ؟؟ سن الرشد يعني ؟؟ معايا .. مركز .. فاهم انا بقول ايه

انا بقالي سنه اهو عندي 18 سنه .. اي خدمه ؟؟ مش حاسه اني اقبلت على روايات عبير المعوقه لاني قريتها وانا في اولى اعدادي زمان  من ورا ماما وما فرقش معايا .. كنت ساعتها حاسه اني عملت الهايله ... من ساعتها وانا فهمت انها معوقه وما فكرتش اقرا حاجه تانيه منها .. ومن ناحيه تانيه علاء الاسواني بتجاوزاته ال +18 قريتها كلها وانا لسه -18

اليوتيوب اتغير .. لا خالص .. نفس التفاهات اللي كنت بتفرج عليها وانا -18 هي نفسها اللي بتفرج عليها وانا +18 .. انا متربيه اوي اوي اوي .. احبيبي ابابا يا زين ما ربيت

دخلت فيلم بقى +18 وعشت دور الناس اللي بتخش الافلام ديه .. اكذب يعني .. وربنا ما دخلت سينما من ايام تيمور وشفيقه .. ما حدش يسالني ليه .. اهو اللي حصل

روحت حتى اتعلمت السواقه وطلعت رخصه بقى .. لالا خالص ..

المهم من غير كتر حوارات .. +18 طلعت اكبر كذبه اتكذبت عليا وانا صدقتها بفبائي وسذاجتي ..

وبالنسبه للناس ال -18 اللي بيقروا الكلام ده .. احب اقولهم الله يسامحكم يا مش متربييين

انا حبيت يكون +18 عشان ال -18 يفضلوا مخدوعين .. مش كفايه اتخدعت لوحدي

السؤال بقى .. فكرت في ايه لما قريت عنوان التدوينه ؟؟ ياه عالظن المعفن .. ياااااااااااااه 

لما كان الادب .. هو طب النفس المجنونه !!

ما هو بصراحه ربنا كده

لما يتجمع في مخي كم الدكاتره الأدباء

والاقي ان عددهم بقى كبير اوي كده

من مصطفى محمود ويوسف ادريس واحمد خالد توفيق والاسواني وابراهيم ناجي وغيره وغيره وغيره

ما اقدرش امنع نفسي من هواجس خياليه جدا نسبه انها تحصل هي 5% او اقل !!

بس انا شايفاني متخرجه من كليه صيدلة بتقدير عام جيد وحفكس لحفلة التخرج عشان ورايا احتفال خاص جدا بالمجموعه القصصيه بتاعتي او الكتاب الساخر اللي ألفته ومش حيحضرة غر 3 اشخاص مغمورين زيي بالضبط وحكون ساعتها عندي شك عظيم في قواهم العقليه لانهم ببساطه اكيد حيكونوا لاسعين

عن لما تحس ان مكانك مناسب ليك جدا .. بس في مكان تاني بيشدك ليه بكل عوامل الجذب   ما هو اصل ديسمبر بدأ وانا عارفه ان الهبل ده لازم يبدأ                                                     اهديني يارب !!

انه ديسمبر مجددا !!

ماذا يعني لي ديسمبر ؟

يأتي هذه المره اقل هدوء .. ولكن مفعما بالكثير من الاحلام والامنيات .. يبدو لي اجمل من سابقه .. اجمل بكثير .. انه مليء بالفراغ المريح .. عقلي لا يشغله شيء ابدا .. شيء من الصمود واللامبالة التي تروقني بشده .. ديسمبر يأتي ليحفزني مره اخرى للكتابه وان كانت اردء كثيرا من السابق ولكنها عثرة العودة ..

يأتي بمزاج جيد .. ودفء اكثر ميولا للحرارة .. ولا ادري  ما السبب .. ياتيني شعور بالازدواج .. رغبة في تناول المثلجات والشوكولا الساخنه في ان واحد .. رغبة في الصيف والشتاء .. رغبة في البحر والشمس .. انها عجائب ديسمبر ..

ديسمبر يستحق الوقت الضائع في التفكير فيه .. يستحق الدراسه ربما .. يستحق التأمل والتفكير والابتسام .. ابتسامه ديسبمر اجمل من غيرها .. ديسمبر يخبرني انه كان عام عاديا بشده .. لا تغيرات سوى في ذلك العضو الماثل تحت جمجمتي .. (دماغي ) اجده تغير كثيرا .. اصبح اكثر روية وثباتا .. ربما هي علامات النضج  .. اقترب شيئا فشيئا من سن الرشد .. وربما هدا التغير كافيا جدا .. فلا داعي للتغير في الطباع او التصرفات .. مازلت اروق نفسي .. اجدني ذات شخصية جيده مقبوله ..

انها نفحات ديسمبر .. قد بدأت وسأكون اكثر احتفاء به من العام الماضي

او ربما بمعنى ادق .. سأكون اكثر ذكاء في التعامل معه

J J J

بداية خلاص بدأت .. (ياسمين &مرام)

يمكن ما كانش قرار صح من الاول

وحشتيني بجد يا زحمة .. وحشني ابقى مش عارفه اكتب ايه ولا ايه .. 

وحشني الكلام والرغي والافكار  .. هو ليه كده ؟؟ 

ليه فجأة دماغي بقت فاضيه  .. ليه الحاجه الوحيده اللي كنت فاكره اني بعرف اعملها ما بقتش اعرف اعملها .. هو انا بقيت نكره مره كده مره واحده من غير مقدمات ؟؟ ولا انا كنت بضحك على نفسي زمان وكنت فاهمه ان عندي كلمتين بعرف اكتبهم وعندي بلوج وما حدش قدي  .. معقول كنت بضحك على نفسي .. لا طبعا .. انا كنت بكتب من غير ما احس ... ودلوقتي عشان بس الكلمتين دول صدعت عشان او اعرف اقولهم  .. طب يمكن طاقه الطلعه الاولايه ديه قلت .. قلت كتيييير زي اللي كان بيجري واتشل مره واحده .. هو فيه ايه ؟؟ ايه اللي اتغير مره واحده .. اانا بغني وارد على نفسي .. باين كده

الناس بتكبر وتعقل وانا بكبر وبتجنن .. انا مجنونه من الاول بس الفولت علا شويتين تلاته .. 

يمكن عشان بطلت اكلم نفسي في المرايه .. وبطلت العب سودوكو .. وبطلت اسمع اللي حواليا .. وبطلت اسمع فيروز من زمان .. يمكن ما بقتش اقف في البلكونه .. ولا اشرب قهوه الصبح .. كل اللي فات ده ايه علاقته .. هو لما حاجه تتغير تجر معاها كل حاجه كده .. مش مقتنعه .. يمكن اقتنع بس لا لا .. 

انا محتاجه روايه .. هي الروايه .. ممكن تغير المود شويتين .. 

.

.

زحمه .. شكلي حعيد تفكير فيكي 

يمكن ما كنتيش قرار صح من الاول 

وكانت كلها افكار متطايره .. طارت كلها خلاص 

:( :( :( 

مرسى مطروح :)

لا اتذكر بقوة متى كانت اخر مره ذهبت فيها الى هناك .. هي غالبا من اربع سنوات عندما كان شعري طويلا قد كسوته بلون اصفر سخيف !!

لا يهم

ما يهم حقا انني قررت الاستعداد جيدا هذه المره وعقدت العزم على ان اكون سعيده بأي وسيلة كانت القي اغراضي في الحقيبه بلا ترتيب .. ما يهم هو ان لا انسى شيئا... سأصنع لنفسي جوا جميلا يجمعني بعمرو وفؤاد ونوال الزغبي ايام التسعينات وبداية الافليه الجديده .. وساسترجع هناك ذكريات الشواطئ عندما ذهبت اليها في التسعينات ايضا .. حالة من الحنين لتلك الحقبه .. وسألبي ما يريد عقلي الباطن ..فقد  تبقى اسبوع وحيد كليل على بداية الانهاك العقلي والنفسي ..

اخترت بلال فضل ليرافقني في رحلتي ..  ببذائاته وإيحائته الخارجه الغير لائقه من خلال كتابين لم انهك في اختيارهما ولم استغرق الكثير من الوقت حتى حصلت عليهم ..

ورجاء .. لا اريد استقبال المكالمات ..

التيتي بلياردو .. والاخوان !!

فكرت قبل كده ايه وجه الشبه ما بين التيتي بلياردو والاخوان ؟؟

انت عادة حتلاقي الاخوان دلوقتي منتشرين في كل مكان .. زي التيتي بالضبط 

عاملين حالة عكننه وتشوية لكل شبر في البلد .. زي التيتي بالضبط 

طالعينلك زي القضى المستعجل في كل حته .. زي التيتي بالضبط 

.

.

بس اخرتهم جردل بويا ينضف الحيطان ... زي التيتي بالضبط :)

قصه ال800 جنيه!!

ادي بقى قصه ال800 جنيه

ايه بقى ؟؟

الفكرة ان انا قررت اما السنه (اللاتيفه ) ديه خلصت

اني الم كل الورق اللي اشتريته طول السنه (اللاتيفه ) ديه

وجدت اني جبت ورق بمبلغ وقدره 826.25 جنيه !!!

مع ملاحظه ان انا ما كنتش بجيب كل الورق كمان

يعني انا واثقه ومتاكده ان فيه ناس جابت ورق بفوق ال1000 جنيه

وان فيه ناس اكتر ما كنش قدراتهم الماديه تسمح بانهم يصرفوا كل المبالغ ديه

في كليه زي أي كليه في مصر .. معظم اهدافها ماديه

يعني لو كانت اسعار الكتب معقوله .. ولو كانت الكتب اصلا ينفع يتذاكر منها

كان ايه لازمه دفع مبلغ ال800 جنيه ؟؟؟

ركز معايا ثانيه

في 27مليون مواطن من الشعب المصري بيعيش تحت خط الفقر بمعنى (دخل الفرد دولار واحد في اليوم )

وبما ان الدولار بقى ب 7 جنيه تقريبا

وبحسبز بسيتز .. حنلاقي ان دخل الشخص المنتمي للطبقه ديه في الشهر حوالي 210 جنيه .. بمعنى ان ال800 جنيه ده دخل الشخص ده 4 اشهر !!!!

بلاش

45 مليوون مواطن مش الشعب المصري بينتمي للطبقى المتوسطه اللي دخلها على اقصى تقدير حوالي 3500 جنيه .. في الشهر

يعني انا جبت ورق بحوالي ربع دخل شهري لمواطن ممكن يكون بيعول اسره مكونه من 4 الى 6 افراد  .. المبلغ اللي ممكن جدا يكون ايجار شقته او تمن دروس ابنه اللي في ثانويه عامه .. او او او

انا فاهمه جدا ان الورق ده جه بالتدريج .. ما اتصرفش مره واحده .. لكن هو في الاخر مبلغ من المااااااااال

بلاش كل الحسابات اللي ملهاش لازمه

ال800 جنيه دول تمن 8 شنط رمضان تبع الاورمان اللي بجد بتكفي اسره كامله لشهر

ال800 جنيه ده مرتب شباب كتير جدا جدا في البلد ديه وشايل بيهم مسؤوليات قد كده

ال800 جنيه كانت تقدر تخلي رب اسره يشغل الصيف لابنه ما بين كورسات تعليم موسيقى او رياضه او غيره

ال800 جنيه ممكن تعالج واحده ست كبيره في السن من المشاكل الصحيه المفاجئه

ال800 جنيه لو كانو معاايا مره واحده كنت عن نفسي حاولت اتعلم حاجه .. السواقه مثلا ..

ما علينا

الاكبر بقى فلوس الكتب اللي ما جاليش قلب احسب فلوسها ..

اللي فعلا ما حدش عمل بيها أي حاجه

يلا حنعمل ايه

بعتذر للناس اللي تحمست جدا وفهمت ان انا معايا 800 جنيه وعايزه اصرفهم دلوقتي

وشكرا للناس اللي ردت عليا .. مهما كانت الاجابات هزليه او واقعيه ..

اما نشوف السنه الجايه حنصرف ايه ..  

عايزه ورده :)

فاكره يا نورهان ..

لما كنا مره في المدرسه .. في مره من مرات حصص النشاط

لما قالوا مين عايزة تيجي تقول كلمه على صاحبتها وتديها ورده

وانا ساعتها قولتلك روحي قولي بوقين حلوين وهاتيلي الورده انا عاوزاها

رحتي استندلتي وقولتي لالالالالالالالالا اتكسف

رحت انا قولتلك عنك ورحت فجاه قومت وطلعت عالمسرح ومسكت المايك وهااااااتك يا رغي عنك يا معفنه وفي الاخر اخترت الورده البيضاء واستهبلت وقولت عشان الابيض ده لون النقاء والصداقه الابديه وشويه هبل كده من كلام المدارس ده

انا بس عايزه اعترفلك في اعتراااااااااااف

انا نقيت الابيض عشان الزمااااااالك .. كنت بغيظك يعني

ثانيا .. انا قومت علشان تختشي على دمك وترضي تيجي عيد ميلادي

افتكرت الموقف ده انهارده

حسيت انك وحشتيني بجد

واني عايزه اضحك زي ما ضحكنا وقتها

وعايزه اعيط لان الموقف ده مش حينفع يتكرر تاني

وعايزه احضنك تاني واحس بفرق الطول المش كبير زي ما انت فاهمه

وحشتيني يا نونو J

عيش وحلاوة !!

..بامكانك الان سيدي الرئيس المخلوع .. واعوانك وعشيرتك واهلك وهشام قنديلك ان تتغلب على انقطاع التيار الكهربائي في موجات الحر بارتداء الملابس القطنيه والمكوث في غرفه واحده .. كما بامكان ابنائك اللائي اخبرت انهم يعيشون حياة عاديه بعيده عن الترف والثراء ان يقفوا مده تتراوح من الساعه الى الثلاث ساعات في طابور طويل الى حد ما للحصول على وقود لسيارتهم ..

سارعوا في تزويج بناتكم ذوات الاربعة عشر عاما .. هي قادره على تكون صاحبه اسرة ناجحه ورجاء لا تنسوا اعطائها تعليمات بالمحافظة على ابنائها  من خطر الاصابه بالاسهال كما حدث لاطفال بني سويف ..انتم على درايه كبيره بهذا الامر ..

بامكانكم السير في الشوارع .. لترفعوا رؤوسكم بما انجزتم .. تلك الانجازات التي حدثتمونا عنها كثيرا .. تمتعوا بما انشئتم من تعديلات واصلاحات في البلاد

لا تنسوا الدعاء لنيلنا الحبيب الذي مؤكد سيقل حجمه بعد ان تركتم الحكم واسقطكم اولئك الكفرة الجاهلين من منصبكم

استمروا في عمليات غسيل المخ .. وثوروا على من أغلق القنوات التي تبث الدين وتدعوا اليه بمختلف الطرق وان كانت تلك الطرق تخالف الدين ..

استمروا في استغلال الدين لمصالحكم الشخصيه .. شرع الله اينما كانت مصلحتكم (حاشا لله ) ..

استمروا في جهادكم ضد بني علمان وليبرال حتى يأتي نصر الله القريب .. استمروا في جهادكم ضد الكفار الخوارج والمرتدين ..

استمروا في تمجيد الرئيس الوهمي .. والدعاء له باستمرار الانجازات والانتصارات

استمروا في الدعاء حتى تنتهي هذه الفتنه وهذا الابتلاء العظيم وانتم تعلمون جيدا ان المؤمن مبتلى ومصاب

ولكن لا تنسوا

ان من جاء جاء بالزيت والسكر

كان لابد ان يرحل بالعيش والحلاوة .. 

قال على رأي المثل .. متمرد !!!

قال على رأي المثل .. متمرد !!!

لأن المركب اللي ملهاش ريس سهل اوي بتغرق

ولأننا حنقطع الايادي ومش حنبوسها

ولأننا مش صعاليك وسط ملوك ...

ولان الحيطان مالهاش ودان

ولان الجري عمره ما كان نص الجدعنه

ولان الباب اللي يجيلنا منه الريح .. مش حنسده .. لكن حنوقف الريح

فاكرين حيجي يوم ونقول

اتوصوا بينا ياللي حكمتونا .. احنا العبيد وانتوا اشترتونا

لكن ورب العزة ما يحصل ..

عمركوا ما اشترتونا وعمرنا ما كنا ولا حنكون عبيد

خليكوا فاكرين .. عمر ما العين تعلى الحاجب  

البلد بلدنا .. والارض ارضنا .. وفي الاخر حقنا نقلع كل طاغيه طغى واستفحل

مش حنبات مغلوبين

ولا حنسلم ونقول آمين

ولا عمركم كنتوا مظلومين

وفي الاخر احنا متمرديــــــــــن

تمـــــــــــــــرد

تمــــــــرد

تمـرد

كــــرش ميدو !!!

من فترة كده لقيت كابتن احمد حسام (ميدو) عامل برنامج تخسيس وزن في حسابه على تويتر اسمه كرش ميدو !!

اللذيذ في الموضوع فكرة ان شخصيه عامه تقرر تعمل ريجيم مع الناس وتتابعهم خطوة بخطوة ..

شيء يثبتلك ان ميدو عبارة عن دماغ محترف .. لان الاحتراف عبارة عن تصرفات .. عبارة عن حيثيات .. وعبارة عن فكر ..

ميدو من اكتر لاعيبه الكورة المفضلين عندي

شايفه انه من الناس اللي ظلمها حظها مش اكتر

اعتزالك .. عكنن عليا شويه

بس رجعت لقيت ان اكيد دماغك وفكرك حيصولك لمكان تاني

اكيد احسن من مكانك ووضعك دلوقتي

مشوار مشرف ..

ميدو .. شكرا لانك مصري J

بقى عندك سنه يا زحمه

السنه  اللي فاتت فتحتك بعد ما خلصت امتحانات ثانويه عامه

وبعد سنه انا برضه لسه مخلصه امتحاناتي ..

مش عارفه المفروض نحتفل مع بعض ازاي ؟؟؟

بس اللي اعرفه اني مبسوطه بيكي اوي .. مبسوطه بوجودك

كانك بيتي .. اللي اخترت فيه كل حاجه على زوقي حتى لو ما عجبش حد

الالوان والديكو وصوت منير .. والزحمه

وكانك صاحبتي اللي بحكيلها كل حاجه .. افضل افضفض لحد اما ارتاح

انتي مساحتي اللي بقول فيها كل اللي نفسي فيه

العالم بتاعي .. حتى لو كان العالم ده وهمي وافتراضي

كان عندي تصور يوم ما فتحتك اني مش حكمل السنه وحقفلك

بس لاء ..

انا بحبك

وبحب كلامي جواكي ..

وبحب مكاني اللي ليا فيه كل حاجه مشروعه وكل الكلام مباح

وبحبك لما بتفكريني بايام ولحظات عدت عليا ونسيتها

18/6

ما اخترتوش من فراغ

اخترته عشان يبقى بيني وبينك 6 اشهر بالضبط .. عشان نحتفل مع بعض كل نص سنه

نحتفل بصداقتنا .. وارتباطنا

نحتفل بنجاحك .. وفرحتي بوجودك ..

وفخري براي ناس كتير عنك .. شرفتيني كتير على فكره

زحمه .. كل سنه وانت معايا

كل سنه وانت مكاني

كل سنه وانا لاقياكي انسب قرار اخدته في حياتي

كل سنه وانتي طيبه

رفعت الاقلام .. !!!!!

كل يوم .. 

ساحاول ان .. 

لكي استطيع ... و ...... 

واتكلم في ....... 

وادهب الى ............. واعود من ..........

استخدم الـ...........

واهاتف ...........

وابكي بسبب ..........

ثم اضحك لاجل ................

لا اطيل النظر الى ..........

لكي لا اتسبب في ............

لانني اكره الــــ...............

ساقارن بعدها بين ......... ثم اختار احد الـ............

سألام بعدها لانني .... لكنني لن .......... ولن .......... ولن ............

رفعت الاقلام !!!!

مجرد اختيار !!!

عمرك فكرت في ان الحياة عبارة عن اختيار ؟

ما هي لو عجباك حتعيشها بالطول والعرض

ولو مش عجباك فالمسجد قدامك .. روح اعتكف

واعمل لاخرتك او لو انت اخ مسيحي اترهبن

واعمل لاخرتك برضه .. انا عن نفسي اخترت اني اعيش

امشي في الشارع واتكلم مع الناس ويبقى عندي صحاب كتير

عايزة اكون مبسوطه .. واعمل كل حاجه تخليني مرتاحه

حتى لو تصرفاتي حتكون مجنونه .. وماله ؟؟

لو انت كمان اخترت تعيشها

اعمل كل اللي نفسك فيه

اصرف فلوسك كلها في كلام فاضي

اسهر .. واقعد في البلكونه اتفرج عالناس

كل الاكل اللي نفسك فيه .. شوكلاته بالذات

اشتري بويا وبهدل حيطه اوضتك (اها لو بابا يوافق )

اضحك .. كل حاجه بتضحك اضحك عليها بصوت عالي

خلي علاقتك كويسه بالناس كلها

خليهم يحبوك ويفكروا فيك وتبقى مهم بالنسبالهم ووجدك فارق معاهم

اقعد استنى اجل يوم في حياتك

وخليك دايما مقتنع انه لسه ما جاش

اتجنن

اتنفس

طير

عيش

لانك اخترت انك تعيش

سحقا للجميع !!!

\وان كنت دوما على خطأ !!

ما المانع ؟؟

يكفي أنني أراه صوابا ..

التفكير في التصرفات قبل فعلها ..

يجعل الحياة  مملة .. متوقعه الأحداث والنتائج ..

كم هذا مريع .. الحياة الرتيبه الروتينه

عديمة الأحداث المجنونة ..

يفقدها  لذة المفاجئات الخفية ..

أحب المفاجئات وإن كانت بشعة .

أحيانا لا تجدي كلمات فيروز أو منير

لا يجدي الأرز باللبن او الحلوى

لا يجدي النوم لساعات طويله او قصيرة

لا يجدي البحر او الوقوف في الشرفه

او الهواء البارد اللذيذ

تحتاج ان ترفع صوتك

تتكلم بطريقه سخيفه

او تأكل بلا حساب للسعرات

أو تسهر حتى الشروق

أو تعيش في فوضى عارمة

أو تتوقف قليلا عن أداء واجباتك

ربما حينها .. تكون أسعد .. أكثر راحة .. أهدأ نفسا

فما المانع ؟؟؟

بعدد خطواتي ونبضاتي وأنفاسي .. سحقا للجميع

إن لم أعجبهم ..!!

أصغر مقاس عندك :3

الوضع انهارده كان متأزم جدا

كان عندي نيه شراء صندل صيفي ..لكن انما الاعمال بالنيات بقى

في الوااااااااااااااقع

ما لقتش مقاسي L

كل ما اشاور على حاجه في الفاترينه وأتسأل السؤال الروتيني الممل ..مقاس كام ؟؟

فأنا بكل فخر أرد :أصغر مقاس عندك

المقاس الأصغر غالبا بيكون 37 .. وده بالنسبالي يعتبر الى حد ما (كبير) L

(وانهالت علي نكات العمة وسخريتها وأبت أن تتوقف .. بلا شفقه ولا رحمه اهئ اهئ اهئ )

اتجهت بكل حواسها تجاه أحذيه الاطفال الملونه المليئه بالأزهار والفيونكات وسخافات الاطفال المعهوده واخدت تنتقي لي ما رأته الاجمل في لكنه سخريه شديده الوضوح ..

المشكله لسه ما جاتش ..

المشكله اني لو فكرت جديا في موضوع جزم الاطفال ده برضه مش حلاقي مقاسي .. لان اكبر مقاس في الاطفال هو 35 وهو الل يعتبر بالنسبالي (صغير )

مقاس 36 انا محصوره فيه بطريقه رزله جدااااااااااااااا

وانا حاليا بحمل مشكلتي ديه في رقبتك انتي يا حكوووووومه

حدش عنده حل ؟؟؟؟

لمبة اوضتي ,,, هي السبب .. هي السبب

  

لمبة اوضتي انهارده كانت عامله استفزاز فظيع لتيته معرفش ليه ,,

المهم كل شويه تقولي يا مرام اقفلي نور اوضتك .. الدنيا نهار

مرام طفي اللمبه انتي مش قاعده في الاوضه .. وزير الكهربا قال لو كل واحد طفى لمبه .. مش حيقطعوا الكهربا علينا .. يا مرام حرام علينا اللي احنا بنعمله في البلد يا بنتي !!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

يالهوي !!

لمبة اوضتي هي اللي مبهدله البلد كده !!

هي السبب في قطع الكهربا والميه كل شويه !!

هي السبب في البطاله وتدهور سوق العمل !!!

هي اللي حتفتح باب شغل المصريات كخادمات لدول الخليج !!

هي السبب في حاله السياحه والصحه والتعليم والبورصه والاقتصاد!!

هي السبب في العشوائيات واطفال الشوارع والجوع والفقر !!

هي اللي وصلت محاكمه مبارك وولاده وفلوله للمرحله ديه !!

هي اللي بتوقع العماير وبتزلزل الزلازيل !!!

هي اللي بتسرق البلد وفولس الشعب !!!

هي اللي ماليه الزباله في الشوارع !!

هي اللي مخليه الناس تمشي بالرشاوي والوسايط !!

يعني انا السبب ؟ :o

طب ما انا طول عمري برا مصر ؟؟ كانت البلد ماشيه من غير لمبتي ؟؟

ما هي كانت بايظه برضه

ماشي يا تيته

انا حقفلها

اما نشوف اخرتها ايهمع وزير الكهربا

دســـــــتور الصيـــــادله :D

بسم الله الرحمن الرحيم

إليكم الان مسوده متواضعه للساده الصيادله قابله للتعليق والتعديل والتحسين

توكلنا على الله

المادة الاولى :

على كل طالب ثانوية عامه مصرية او شهادة معادله عربيه كانت او اجنبيه ان يعلم تمام العلم ان الصيدله هي من تختار طلابها لا هم من يختاروها وعلى هذا فلا داع للتفكير المطول

الماده الثانية :

ايقاع اقسى العقوبات بكل شخص متعلما كان ام جاهلا يظن ان الصيدله هي مهنة تجاريه بحته ولا تمط للعلوم الطبية بصلة

المادة الثالثة :

الاعدام شنقا لكل من يطلق القاب (بياعين ،بقالين ,.....) على السادة الصيادلة الافاضل ويخفف الحكم الى تابيدة في حالات المرض والخرف وتجاوز سن السبعين

المادة الرابعة :

التقدير الكامل من كافة طوائف الشعب لمهنة الصيدلي التي لا غنى عنها مع اقامة ندوات ومحاضرات لتثقيف المصريين وبيان اهمية الصيدلي

المادة الخامسه :

يتعين على الحكومة المصرية .. توفير صيدليه لكل طالب يتسلمها فور تخرجه من الكليه مع سهولة اجرائات التسليم واحتوائها كافة الكاماليات المطلوبة

المادة السادسة:

حفاظا على ادمية وانسانية الصيدلي يحق له عدم استقبال وصفات الاطباء الغير واضحه والمطالبة بسرعة تعديلها من قبل الطبيب حيث يجب ان تكتب بوضوح يستطيع قرائته الشخص العادي بنسبه لا تقل عن 75 % كما يحق للصيدلي في حال شعر باستفزاز ناتج عن قرائتة لل(روشته )المبهمة ان يقدم شكوى في نقابة الاطباء ويحول الطبيب (صًاحب الوصفة )للتحقيق في الحال .

المادة السابعة :

على وزارة التربية والتعليم ترسيخ مبادئ العمل الشريف في أذهان ابنائنا الطلاب وتوضيح اهميه المجال الدوائي والعلاجي وتوصيلها اليهم بطريقه مبسطه ميسرة بارقى وافضل الوسائل الممكنه

الماده الثامنه :

على وزارة الداخليه توفير سبل الامن الكامل لشركات ومصانع الأدوية والصيدليات على مدار اليوم حرصا وحفاظا على امن وامان الصيادله الكرام

الماده التاسعه :

الاعفاء الكامل للصيادلة الذكور من التجنيد للتفرغ والشروع في العمل في هذه المهنة الجليله ذات الاهميه اللامتناهيه

الماده العاشرة :

على السادة المواطنين تحري الدقه والوضوح عند طلب احد انواع العقاقير والابتعاد عن الوصف الشكلي لنوع الدواء حفاظا على مرارة الصيدلي ومنعا لحدوث الاخطاء الطبيه وحالات التسمم الدوائي

المادة الحادية عشر :

الادوية البديله هي مجرد اختلاف اسماء شركات منتجه لا اكثر وعلى المواطنين قبول الدواء البديل في حال عدم توفر الدواء الاصل

المادة الثانية عشر :

يتوجب على الحكومة المصريه صرف المعونات الشهرية لطلاب كليه الصيدله لتغطية مصاريف (الكتب و البلاطي والادوات والورق والمحاضرات والضفادع والجوانتيات !!)

الماده الثالثه عشر :

السيريلاك والبامبرز وجيل الشعر منتجات بقاليه لا يجب ان تتوفر في الصيدليات بتاتا كما يمنع بيع العقاقير فرادا

.. هذا ونحن نستقبل افتراحاتكم وارائكم على مدار الساعه

لتعديل المسوده والخروج بها لافضل صورة وشكرا

مرام العجمي .. اعدادي صيدله .. جامعه الاسكندريه  

عندما أبكاني عمر خيرت ..

مصر تتحدث عن نفسها بصمت وقور  .. مع ألحان الأيام ..

مقطوعه متأنيه .. تحاكي انتمائك .. وكأنها تتراقص بين غرف قلبك النابض المصري الأصيل  ..

صدرك سيعلو ويهبط .. كما يعلو عمر خيرت ويهبط على سلمه الموسيقي

سيمر أمامك النيل الصامد .. والصعيد القوي الواعد

ستسترجع ما افقدتك الأيام من حنين وطني واجب

ستشتاق لها وان كنت لم تخرج منها

سترفع رأسك فخرا بلا نقاش ولا تردد

ستبتسم رغما عنك .. ستعيد سماعها فور انتهائها

ستشعر وكأنك في غنى عن الحديث المكثف عنها

يكفي ان تستمع الى مقطوعه تصف حسنها وسيادتها

.

.

.

الأيام .. مقطوعه تدغدغ اساريرك

وتتمايل مع احساس الشجن الماثل في اعماقك

وتثبت احساس الرياده الفخور بمصريتك

وبالطبع ستحزنك على وضع راهن .. زائل عما قريب

ان شاء رب العباد والبلاد 

.

.

.

(احرك عيناي بعيدا عن الورقه .. الرؤية ليست واضحه اغمض عيني وافتحها لتسقط دمعتين في طريقهما الى تعزيز الشعور المكنون بين ماض مغترب وحاضر متأمل .. بحبك يا مصر J )